МЕМЛЕКЕТТІК РӘМІЗДЕР — ТӘУЕЛСІЗДІК НЫШАНЫ

Мемлекеттік рәміздер – елдің ұлттық болмысын, дербестігі мен тәуелсіздігін бүкіл әлемге танытатын белгі. Аталмыш мерекеге орай қаламызда Мемлекеттік ту көтеру рәсімі мен салтанатты іс-шара өтті. Бұл мейрам халқымызды мемелекеттік рәміздерді құрметтеу мен отансүйгіштікке жетелейді. Еліміздің әрбір азаматы ұлттық рәміздеріміздің тарихын жатқа біліп, азаматтық кодымызды орасан зор мақтанышпен айтуы міндетті.
4 маусым ҚР — ның Мемлекеттік рәміздері күні. Осыған орай, қаламызда мерекелік шеру өтті. Тәуелсіздік саябағына жиналған қонақтар бір мезетте бірге Әнұранды қосыла шырқап, егемендіктің басты белгілеріне құрмет көрсетілді. Шараның басты мақсаты – жастар мен жасөспірімдер арасында ұлттық рухани құндылықты бойымызға сіңіру. Алаңға жиналған қонақтардың қатары қалың. Мерекелік жиынға әскерилер мен күштік құрылым басшылығы, депутаттар, ардагерлер, зиялы қауым өкілдері мен жастар қатысты. Патриоттық әндер орындалып, әскери оркестрдің музыканттары өнер көрсетті.
Іс-шара үш бидің жолы тоғысқан алаңда кеңінен тойланып, қала халқына мерекелік көңіл-күй сыйланды. Айта кетейік, бұл мереке 1992 жылы тәуелсіз Қазақстанның жаңа мемлекеттік рәміздері күні болып бекітілді. Мемлекеттік рәміздер күні — өз елі мен ұлттық бірегейлігі үшін мақтаныш күні.