БАЛАЛАР БОЛАШАҒЫМЫЗ

1 маусым балаларды қорғау күні. Әлемнің барлық елі мерекені кең көлемде атап өтеді. Бұл шара қазақ елінде де сән-салтанатпен тойланады. «Гүл Астана» балабақшасы аталмыш мерекеге орай балалар мен ата-аналарға арнап арнайы концерт өткізді.
Ұқсайды бар тыныштық жер бетінде,
Ұйқыдағы сәбидің келбетіне.
Ояту былай тұрсын, рұқсат жоқ…
Ұйықтап жатқан ұлымды тербетуге, — деп Мұқағали атамыз жырлағандай еліміздің ертеңі балалар. Баланың ең сенімді қорғанысы – дені сау, тату, берекелі отбасы. Қуаныш пен шаттыққа толы балалық шақтан асқан сұлулық жоқ, оны солай ету – отбасының, қоғамның, мемлекеттің міндеті. Бұл күнінің мақсаты – балалардың өмір сүруге, болашаққа деген ойының жарқын болуына жол салу. 1 маусым еліміздің түкпір-түкпірінде мәдени іс-шаралар өткізіліп, балаларға мерекелік көңіл-күй сыйланады. Соның бірі «Гүл Астана» балабақшасының бүлдіршіндерге мерекелік концерті. 2012 жылдан бері қызмет етіп келе жатқан ұжым, биыл екі жүзге тарта баланы мектепке аттандырғалы отыр.
Балаларды қорғау күні мереке ғана емес, сонымен қатар, болашаққа бағдар жасайтын маңызды шараның бірі. Адамзаттың алдында тұрған зор міндет — кейінгі ұрпақтың бақытты өмірін қалыптастыру деген балабақша ұстаздары мектеп табалдырығын аттайтын бүлдіршіндеріне ыстық лебіздерін жеткізді.
Мерекеде болашақта адамгершілікке, әділдікке, баянды өмірге толы қоғам құру жайлы айтылды. Оның негізі — балаларға барлық жағдай жасау. Балабақшаның атқарып отырған қызметі мен біліміне риза болған ата-аналар, балаларының ұстаздары мен мекеме ұжымына өз алғыстарын білдірді.
Бүлдіршіндер мерекелік іс-шарада әсем ән айтып, мың бұрала биледі. Шара соңында балабақшада түлеп, мектепке аяқ басқан балалар әсем әндерімен ұстаздарына алғыс білдірді.