Шымкент қаласы қоғамдық кеңесінің кезекті отырысы өтті. Жиында күн тәртібіндегі тарифтер мәселесі, индустриялды аймақтардағы электр энергия бағасының қымбаттауы секілді мәселелер қозғалды. Онымен қоса мәдениет, спорт және дене шынықтыру, ішкі саясат және жастар істері жөніндегі басқарма басшылары атқарып жатқан жұмыстарына баяндама жасады. Бас қосуда аталған мәселе бойынша жауаптыларға бірқатар ұсыныстар мен сыни пікірлер айтылды.
Шымкент қаласы қоғамдық кеңесінің кезекті отырысы өтті. Бауыржан Әлтеев басқарған кеңесте қала әкімінің орынбасары Сәрсен Құранбек, қоғамдық кеңес мүшелері, басқарма басшылары және БАҚ өкілдері қатысты. Жиын басында қоғамдық кеңес мүшесі Нұргүл Қобланова «Жұлдыз», «Оңтүстік», «Бозарық», «ТЛЦ» секілді индустриялдық аймақтарда орналасқан кәсіпкерлердің электр энергиясының қымбаттауы, «Жұлдыз» индустриялдық аймағында коммуникация (су, жарық, газ, кәріз жүйесінің) болмауы және жер телімдерінің жалға алу тарифтер бағасының бірнеше есеге қымбаттауы секілді мәселелер бойынша жазған арыздарын оқып, шешу жолдарын ұсынды.
Бұл мәселеге байланысты Шымкент қаласының кәсіпкерлік және индустриалды-инновациялық даму басқармасы басшынысың орынбасары өзінің ұсынысын айтып, жер мәселесі бойынша тариф бағасы 21 теңгеден 61 теңгеге көтерілуінің себебін түсіндірді. Алайда, бұл бағаның орынсыз қымбаттауына кәсіпкерлер наразылығын тудырды. Қоғамдық кеңестің төрағасы Бауыржан Әлтеев бұл күрделі мәселелердің шешімін қалалық басшылықпен бірге ақылдаса отырып, шешу жолдарын қарастыратынын айтты.
Сондай-ақ, қоғамдық кеңесте 3 басқарма басшыларының, яғни: мәдениет, тілдерді дамыту және архивтер басқармасы, дене шынықтыру және спорт басқармасы, ішкі саясат және жастар істері жөніндегі басқарма басшыларының 2023-2024 жылы атқарылған жұмыстарына есеп беріп, Шымкент қаласындағы табиғи монополиялар субъектілерінің тарифтері және тарифтерді ұстап тұру бойынша жүргізіліп жатқан жұмыстар туралы Табиғи монополияларды реттеу комитетінің Шымкент қаласы бойынша департаментінің басшысы Кенжеболат Кошекбаевтың, баяндамасы тыңдалды.
Баяндамашыларға қоғамдық кеңес мүшелері сұрақтар қойып, өз ұсыныстарын енгізіп, алдағы уақытта қоғамдық бақылауға алатындарын жеткізді.
