Бүгінде отандық бизнесті қолдау басты міндетіміз. Бұл еліміздің экономикасының қарқынды түрде дамуына да оң әсерін береді. Тіпті бұл туралы премьер-министр Олжас Бектенов тағайындалған сәтінен бастап, елдің экономикалық дамуы бағытында Мемлекет басшысының берген тапсырмаларын орындайтынын айтқан болатын.
Ол өз сөзінде сонымен қатар: “Отандық өндірісті ынталандыру үшін шаралар қабылданатын болады. Қазақстанда өндірілетін өнімнің үлесін ұлғайту қажет. Біздің басты міндетіміз – отандық бизнесті қолдау. Ауыл шаруашылығының әлеуетін тиімді пайдалану маңызды. Сондай-ақ су ресурстары, энергия үнемдеу, көлік-логистикалық желі бойынша белсенді жұмыс істейтін боламыз. IТ және жаңа технологияларды пайдалану мүмкіндіктерін кеңейту. Заңның үстемдігін қамтамасыз ету шаралары және халықты толғандыратын басқа да мәселелер әрқашан үкіметтің назарында болады. Үкімет еліміздің игілігі үшін жұмыс істейтін болады. Басты міндет – отандық бизнесті қолдау «, — деді Олжас Бектенов. Осыған орай 2024 жылғы 1 мамырда Премьер-Министрдің отандық өндірісті қолдау бойынша тапсырмасында вице-премьер Серік Жұманғарин Шымкентке барып, жұмыс істеп тұрған ірі өндірістік және ауыл шаруашылығы нысандарының жұмысымен және құрылыс барысымен танысып қайтты.
Шымкент көлік-логистикалық орталығының аумағында ауданы 5 га «НМИ-Юг» ЖШС көпфункционалды қойма кешені салынып жатыр. Жеке инвестор есебінен қаржыландырылған инвестициялық жобаның жалпы құны- 10,2 млрд теңгені құрайды. Құрылыс-монтаждау жұмыстары 90% — ға орындалған құрылыстың бірінші кезеңін биыл аяқтау жоспарлануда. Қойма үй-жайларының жалпы ауданы 22 мың шаршы метрді құрайды. «НМИ-Юг» ЖШС құрылтайшысы Айжан Наимбекованың айтуынша, бұл климаттық бақылаудың икемді жүйесі, тоңазытқыш камераларының температурасын -18-ден +4 градусқа дейін реттеу мүмкіндігі бар А+ санатындағы қойма болады. Бұл тауарлардың кең ассортиментін сақтауды қамтамасыз етеді.
Одан кейін, вице-премьерге «Alsera kz» ЖШС жылыжай кешенін салу жобасы таныстырылды. Құны $650 млн құрайтын инвестициялық жобаны «Бозарық» индустриялық аймағында «Alarko Holding» түрік компаниясы жүзеге асыруда. Бұл жаңа технологияларды қолдана отырып, 500 га алаңда кезең-кезеңімен іске асырылмақ. Мұнда қияр, қызанақ, бақша мен басқа да ауылшаруашылық өнімдерін өсіру жоспарлануда. Бұл Шаһардағы қызанақ пен қияр өсіретін ең үлкен жылыжай кешені болмақ. Жоба аясында 2000-ға жуық жаңа жұмыс орындары ашылады.
Қала әкімі Ғабит Сыздықбеков СЛО аумағында жүзеге асырылатын басқа да жобалар туралы хабардар етті. Серік Жұманғарин іске асырылып жатқан жобалардың перспективаларын жоғары бағалап, мемлекет тарапынан барлық қажетті қолдау көрсетілетінін айтты. Жобалардың аграрлық- өнеркәсіптік кешен саласындағы мемлекеттік саясаттың мақсаттары — ауыл шаруашылығы өнімдерін терең өңдеуді 70% — ға дейін жеткізуге мүмкіндік беру. Президентіміз Қасым-Жомарт Кемелұлы еліміздің жаңа экономикалық бағдарының басты басымдықтарының бірі ретінде — жеке кәсіпкерлік бастамаларды ынталандыру деген болатын. Осыған орай, вице-премьер «AZALA Textile»ЖШС — Қазақстандағы дайын тоқыма өнімдерін өңдеу және шығару бойынша толық аяқталған циклдің ірі және жалғыз тоқыма фабрикасына барды. Бірегей тоқыма комбинаты иірілген жіптен тоқыма бұйымдарына дейін өнім түрлерін шығаратын фабрикада 475 адам жұмыс істейді. Кәсіпорынның қуаттылығы жылына 6 800 тоннадан астам иірілген жіп пен 14 миллион сызықтық метр ауыр матаны құрайды екен. Бұл экспортқа бағытталған кәсіпорын болғандықтан, өз өнімдерінің шамамен 70%-ын шет елдерге жіберіп отырады. Мысалы: Литваға, Германияға, Италияға, Польшаға, Бельгияға, Данияға, Латвияға және Түркияға секілді таяу елдерге тасымалдайды. Өндірістік цехтарды тексеру және зауыт басшылығымен әңгімелесу қорытындысы бойынша Серік Жұманғарин отандық тоқыма өндірушісінің мемлекеттік мұқтаждықтары үшін өнім сатып алуды ұлғайту мүмкіндігін үкіметтік деңгейде пысықтауды тапсырды.
