«Таза Қазақстан» экологиялық акциясына шымкенттіктер белсенді қатысуда. «Өнегелі ұрпақ» апталығында өткізіліп жатқан абаттандыру жұмыстарында қазыналы қарияларымызға құрмет көрсетілді. Мегаполистің барлық аудандарында Ұлы Отан Соғысы ардагерлері және жұмысқа жарамсыз қариялардың үйінде тазалық жұмыстары жүргізілді.
Еңбекші ауданында тұратын, жұмысқа жарамсыз және ардагер ақсақалдардың үйінде абаттандыру жұмыстары өтті. Оған аудан әкімдігі, ардагерлер кеңесі, тазалық сақтау мекемесінің қызметкерлері, ЖОО студенттері мен қоғамдық ұйым мүшелері бір адамдай ат салысты.
Жалпы, ауданда 237 тыл ардагері бар. Оның ішінде жұмысқа жарамсыз 13 ардагердің ауласы шөптен тазартылып, ағаштың түптері әктелді. Аталған акция аясындағы тазалық жұмыстары Әль-Фараби ауданында да жалғасты. Ардагерлердің ауласында Сәрсен Абайұлы бастаған бір топ белсенділер, еріктілер, студент жастар абаттандыру жұмыстарын жүргізді. Жастар ауланы қоқыстан тазартып, ағаш түптерін қопсытты.
Тазалық жұмыстары ардагер ақсақалдарымыздың үйлерінде ғана емес, қаланың әрбір аумағында жалғасты. Шаһар тұрғындары, еріктілер, аудан әкімдігі, студент жастар мен мекеме қызметкерлері бір адамдай жұмылып, аулаларды қоқыстан тазартты.
Айта кетейік, акция аяқталған кейін де қаланы көркейту үшін тазалық жұмыстарын дәстүрлі түрде жалғастыру жоспарда бар.
