Еліміздегі экологиялық мәдениетті қалыптастыру мақсатында «Таза Қазақстан» республикалық экологиялық акциясының «Таза өлке» апталығы басталған болатын. Игі бастамаға Шымкент қаласындағы Қаратау, Абай, Еңбекші аудандарының қала тұрғындары, қоғам белсенділері, ұйымдар мен кәсіпорындардың қызметкерлері ерекше қолдау білдіріп, жұмыстарды белсенді атқарды.
“Таза өлке” апталығы аясында бүгін Шымкентте ТазаШым атты жалпы қалалық тазалық іс-шарасы өткізілді. Шара барысында барлық аудандар мен елді-мекен аумақтарында тазалау жұмыстары жүргізілді. Солардың бірі Абай ауданы аумағында сенбілік жұмыстар таңғы 8 ден басталды. Науқанға Шымсити, Тұран, Асар және өзге де іргелес шағын аудандарының 500-ден астам тұрғындары қатысып, 20-ға жуық техника жұмылдырылды. Іс-шараға тұрғындармен бірге ауыл биі, еңбек ардагері, отбасы және әйелдер істері жөніндегі комиссиясының мүшелері атсалысып, қолдау көрсетті. Қатысушылар аулаларды, жер асты және жол үсті жүргіншілер жолдарын, аялдамаларды, сонымен бірге Бәйдібек би даңғылы мен А2 тас жолы бойын тазалау және абаттандыру жұмыстарын жүргізді.
Бұл акцияға Қаратау ауданының тұрғындары мен қоғам белсендіре де белсене атсалысты. Төлепбек Назарбеков атындағы аллея, Шаяхметов көшесі аумағында орналасқан кәсіпкерлік нысан қызметкерлері өз аулаларында ауқымды тазалық жұмыстарын ұйымдастырып, көгаландыру жұмыстарын атқарды. Акция аясында 160-қа жуық кәсіпкерлік нысан қатысып, республикалық акцияға өз үлестерін қосты.
Мемлекет басшысы Қ.К.Тоқаевтың аумақтарды абаттандыру, көгалдандыру жөнінде берген тапсырмасына орай, бүгін қалалық Қазақстан халқы Ассамблеясы жанындағы этномәдени бірлестіктердің төрағалары «Таза Қазақстан» республикалық акциясы аясында Еңбекші ауданындағы «Қазақстан – Түркия достығы» саябағына барып, тазалық жұмыстарын жүргізді. Жалпы сенбілікке 200 адам, 6 техника тартылды. Бүгінде еліміздің үшінші мегаполисінде абаттандыру, көріктендіру жұмыстары қарқынды жүргізілуде. Шағынаудандар мен саябақтарға және гүлзарларға ағаш көшеттері отырғызылып, аумақтарды тазалау-сырлау жұмыстарына шымкенттіктер барынша жұмылдырылған.
Абай ауданындағы Асанбай Асқаров атындағы дендрологиялық саябақта ауқымды сенбілік іс шарасы жалғасын тапты. Жалпы қалалық акцияға белсенді жастар мен еріктілер, Дендросаябақ қызметкерлері , белсенді атсалысты. Саябақ аумағында жасыл желекті күтіп баптау, шөп ору, ағаштарды әктеу, аяқ жолдарды тазалау, қоқыстарды шығару жұмыстары жүргізілді.
