Көлік жүргізушілерінің полиция қызметкерлеріне пара ұсыну фактілері бар. Қазір тәртіп сақшыларының арасында «Integrity check» деген бағдарлама жұмыс істейді. Осы бағдарлама аясында былтыр пара беру фактілерінің 127 дерегі анықталды. Бұл жайында Орталық коммуникациялар қызметі алаңында Әкімшілік полиция төрағасы Қайсар Сұлтанбаев мәлімдеді.
Оның хабарлауынша, осы фактілер бойынша қылмыстық істер тергеліп жатыр. Сондай-ақ спикер барлық жол ережелерін бұзу фактілері бойынша ескерту жасала бермейтінін еске салды.
«Әр құқық бұзушылықтың деңгейі болады. Сол деңгейіне байланысты шара қолданылады. Мысалы, ауыр құқық бұзушылықтар болып жатса, тек айыппұл салу ғана емес, жүргізуші куәлігінен айыруға дейін, қамауға алуға дейінгі шаралар да қолданылып жатады. Ал, енді ұсақ-түйек жол ережелерін бұзу фактілері кезінде ескертумен де шектелу Әкімшілік кодексінде көзделген. Соның бірі 620-бап. Сонымен бірге күндізгі кезде автокөліктердің жарықты жақпай жүргендерге ескерту жасаймыз», – деді спикер.
Былтыр осындай 597 мың көлік жүргізушілері ескертумен шектелген болатын.
