Соңғы жылдары еліміздегі бизнес бастаған жандарға мемлекет тарапынан жүйелі қамқорлық көрсетілуде. Оған әр өңірден ашылған кәсіпкерлерді қолдау орталығы дәлел. Шымкентте де үш тарап бірлесіп, отандық кәсіпкерлерді қолдау бойынша келісім жасады. «Самұрық-Қазына» қоры, «Атамекен» ұлттық кәсіпкерлер палатасы және қала әкімдігі бірлесіп ұйымдастырған конференция бизнесті дамытуға арналған. 
Конференция барысында «Самұрық-Қазына Контракт» жауапкершілігі шектеулі серіктестігі бас директорының орынбасары Әділет Батталов отандық тауар өндірушілерді қолдаудың жаңа тетіктері туралы айтты. Яғни, Мемлекет басшысының Жолдауда жүктеген міндеттерін орындау мақсатында «Самырұқ-Қазына» қоры сатып алу саясатының жаңа моделін қалыптастырған. Ол қордың сатып алу жүйесінің ашықтығы мен әділдігін қамтамасыз етеді және отандық кәсіпкерлерді қолдауды көздейді. Бүгінде қор импортты алмастыруға бағытталған бірегей бағдарламаны жүзеге асырып жатыр.
Конференцияның ашылуы барысында кәсіпкерлік және индустриалды-инновациялық даму басқармасының басшысы шаһардағы өнеркәсіп пен кәсіпкерлікті дамыту мақсатында атқарылып жатқан жұмыстарды баяндады. «Самұрық-Қазына» қоры, «Атамекен» ұлттық кәсіпкерлер палатасы және Шымкент қаласы әкімдігі отандық тауар өндірушілер мен бизнесті қолдау бағыттарында ынтымақтастық орнату жөнінде үшжақты келісімге қол қойды. Конференция аясында шымкенттік кәсіпкерлерге қордың сатып алуларының жаңа ережелерін түсіндіруге арналған оқыту семинары да өтті.
