Шымкент қаласынан тұрғын үй алуға ниетті жандар үшін жылжымайтын мүлік жәрмеңкесі өтті. «Отбасы банк» акционерлік қоғамының ұйымдастыруымен болған іс-шара 17-18 тамыз күндері ғана жалғасады. Және тек осы екі күнде еліміздегі ірі құрылыс компанияларынан жеңілдікпен баспана ала аласыз.
Отбасы банк салымшылары үшін керемет мүмкіндік. 17-18 тамыз күндері қазақстандық ірі құрылыс компаниялары 15 пайызға дейінгі жеңілдікпен түрлі санаттағы үйлерді сатуға қойды. Арнайы ұйымдастырылған жәрмеңкенің тиімділігі — сіз бір жерден 17 түрлі компанияның өкілдерінен толық ақпарат алып, салыстырып, арасынан өзіңізге ұнағанын таңдай аласыз. Мұнда талғамыңызға сай, заманауи, сапалы, ақылды баспаналарды да кездестіре аласыз. Жәрмеңкеге келушілер әр алуан ұсыныстардың ішінен өздеріне оңтайлы нысандарды таңдап, жылжымайтын мүлікті сатып алу тәртібі бойынша банк кеңесшілерінен жан-жақты ақпарат алып, ең тиімді төлем жолдарын есептетуге бірегей мүмкіндік алды. Іс-шараға қатысушылар жәрмеңке барысында тіпті несиеге алдын ала мақұлдау қызметін қолданып, заем алу туралы келісімін бірден осы жерде ала алады.
Жамиля Бейсенова Отбасы банк салымшысы. Яғни қаладағы әкімшілік іскерлік аймақтан жаңа баспана алуға ниетті. Бүгінгі жәрмеңке арқылы уақытын үнемдеп бір күнде бір жерден барлық компаниялардың ұсыныстары мен жеңілдіктерін тыңдап көрді. Бағасы қалтасына қонымды, сапалы баспана алуды армандайтын қала тұрғыны қалада осынша компаниялардың бар екенін білмедім дейді. Сондықтан да ұйымдастырушыларға алғыс білдірді.
Қазіргі уақытта 200 мыңға жуық шымкенттік тұрғын үй алу үшін Отбасы банкінде депозит жинап жатыр. 2023 жылдың басынан бері 15 мыңнан астам азамат дәл осы мақсатпен жаңа салым ашқан. Отбасы банкінің жинақ шоттарына деген мұндай сұраныс несиелер бойынша пайыздық мөлшерлемелердің төмен болуымен түсіндіріледі. Банк клиенттері бастапқы жарнаны өз шоттарында жинақтай отырып, кейін 3,5%-дан 10%-ға дейінгі мөлшерлемемен тұрғын үй сатып ала алады. 2023 жылдың басынан бері 2567 шымкенттік осы мүмкіндікті пайдаланып, қоныс тойын тойлап үлгерген.