ШЫМКЕНТТІК ИНТЕЛЛЕКТ ЖАСТАР АНЫҚТАЛДЫ

Қаламыздың ұшқыр ойлы белсенділері IQ Zhastary интеллектуалды ойынында бақ сынаған болатын. Сайыста 16 команда білімдерімен бәйгеге түсіп, үздік шыққан төрт құрама екінші кезеңге өтті. Екі күнге созылған ойын нәтижесінде әзілкеш жастардан құралған Шымкент қаласының Жайдарманшылары жеңімпаз атанды.
Жастардың ой-өрісін дамытып, білімділікке жетелейтін жобаның екінші кезеңі өз мәресіне жетіп, жеңімпаздар анықталды. ҚР Конституция күніне орай жастардың ұсынысмен қолдау тапқан шара екі күнге созылды. Айта кетейік, ІQ ZHASTARY интеллектуалды сайысына 16 команда қатысып, оқ бойы озық шыққан Асанбай Асқаров, Ересек Еркектер, Әуезов және Жайдарман командалары екінші кезеңге өткен болатын. Ұйымдастырушылардың айтуынша тартысты бәсеке жоғары деңгейде өтіп, алдағы ойындарды кең көлемде өткізу жоспарлануда.
Алғашқы болып сынға түскен құрамалардан үздік үштікті Асанбай Асқаров тобы түйіндеді. Соңғы шешуші кезеңде Жайдарманшылар Әуезов командасынан басым түсіп үздік атанды. Команда мүшесі Нұрым Досболов сайыс жоғары деңгейде өткенін, зияткерлік ойында алғаш рет топ жарғанын айтты.

Жүзден жүйрік атанған жеңімпаздар қалалық ішкі саясат және жастар істері жөніндегі басқармасы атынан диломдар және бағалы сыйлықтармен марапатталды. Сайыс жастардың интеллектуалды әлеуетін арттыра отырып, ой-өрісін кеңейту мақсатында өтілді.