ТРАНСПЛАНТАЦИЯ – ҚАТЕЛІКТІ КЕШІРМЕЙДІ!

Облыстық дәрігерлер 2 адамға алғашқы бүйрек трансплантациясын жасады. Бұл туралы облыстық аурухананың бас дәрігері мәлімдеді. Бүйрек ауруларына шалдыққан науқастарға туыстары донор болып, адам өмірін арашалап қалған. Ағзаның бұл мүшесіне трансплантация алдағы уақытта тек Астана мен Алматы қаласында ғана емес, Шымкент пен Түркістан облыстарында да жүзеге аспақ.

Биыл облыстық клиникалық аурухана Алматы қаласының орталықтарымен бірлесіп, екі жақты меморандум жасады. Нәтижесінде екі аурухана дәрігерлері бір-бірімен тәжірибе алмасып, біліктілігін арттырып келеді. Жыл басынан бері 5 науқас ақ халаттылардың көмегіне жүгініп, бүйрек трансплантациясы операциясын жасатқан. Соңғы 2 адамға жасалған ота тек облыстық клиникалық аурухана дәрігерлерінің қатысуымен жүзеге асып отыр. Күрделі де қиын отаға 15-20 дәрігер қатысып, аса мұқияттылықпен бірлесе жұмыс жасайды.

Адамға екінші өмір сыйлау – тек дәрігерлердің қолында емес. Сондай-ақ лайықты донордың табылуы да аса маңызды. Көп жағдайда біздің елімізде донорлық тапшылық байқалады. Әсіресе бүйрек және бауыр мүшелерін алмастыру барысында донорлық ағза көбенесе туыстарынан не мәйіттерден алынады екен. Алайда елімізде әлі мәйіттік донорлық дамымаған. Ал облыстық ауруханада жасалған бүйрек ауыстыру отасы нәтижесінде екі науқасқа өз туыстары бүйрегін беріп, адам өмірін арашалауға мүмкіндік туған.

Бүйрек трансплантациясына мұқтаж жандар тізімі біршама. Мамандардың сөзінше 160-тан астам адам бүйрек трансплантациясын қажет етіп отыр. Кемі 4-6 сағатта созылатын бұл операцияда оқыс әрекет кешірілмейді. Одан бөлек, оңтүстік өңірде бауыр трансплантациясын қолға алу да көзделіп отыр.