ЗАҢСЫЗ ҚҰРЫЛЫСҚА ЖОЛ ЖОҚ!

Заңсыз құрылыспен күрес! Абай ауданына қарасты Достық елдімекенінде орналасқан 50 заңсыз үй құрылысы бұзылды. Арнайы құрылған комиссия шешімімен сүрілуі тиіс болған үйлерге 2021 жылдан ескерту беріліп келе жатыр. Бірақ, заңсыз жер иеленушілер ескертуге құлақ аспай құрылыс жұмыстарын жүргізген. Жалпы бүгінгі күнге дейін 5 рет жасалған рейд барысында заңсыз деп танылған 150 үй құрылысы қала әкімі Мұрат Әйтеновтың тапсырмасымен сүрілген.Мемлекет меншігіндегі жерді заңсыз иеленушілердің ешқандай құжаты жоқ. Яғни әкімдіктің рұқсатынсыз бос жатқан жерлерді өз атына рәсімдеп алған. Көбісі белгі ретінде шағын үйлер тұрғызып, қоршау орнатып қойған. Абай ауданы бойынша мұндай үйлердің жалпы саны — 1470. Бүгінгі күнге дейін Ынтымақ және Достық елдімекендеріндегі 150 осындай үй сүрілді. Нақтырақ тоқталсақ Достықта заңсыз салынған 293 үй бар, оның 11-інде тұрғындар өмір сүріп жатыр, ал қалған 282 үй тұруға жарамсыз. Дәл солай Ынтымақ елдімекенінде де 452 үй заңсыз орналасқан. Оның 368 тұруға жарамды болса, 84-і бос тұрған нысан. Бұл тізімге ілінген жер иелеріне 2021 жылдан бері ескерту беріліп келеді. Әкімдік тарапынан бірнеше рет ескерту жасалғанына қарамастан тұрғындар құрылыс жұмыстарын жалғастыра берген. Енді міне заңды елемегендердің бос тұрған үйлері арнайы техникалармен сүрілді. Ал, үй ішінде өмір сүріп жатқан тұрғындарға кезекті ескерту берілді. Және үйді босатып, құрылыс материалдарын алып кетуге бір ай мерзім берілді.Айта кетейік, 1470 жалған құжат иелері тарапынан осындай заңсыздыққа алдандық деген арыз тек Ынтымақ елдімекеніндегі 13 тұрғыннан ғана келіп түскен. Ол бойынша бір азамат күдікті деп танылып, қазіргі таңда тергеу амалдары жүруде. Ал,бүгінде бұзу жұмыстары жүріп жатқан Достықтан құзырлы органдарға ешқандай шағым түспеген екен. Бірақ әлі де, заңсыз жер иелері өздерінің алданғандарын растап прокуратураға арыздана алады. Сонымен қатар, әкімдік қызметкерлері халыққа жер сатып аларда құжаттың заңды екеніне басты назар аударса дейді.

Заңсыздықпен күресу ары қарай жалғаса бермек. Бүгінде өзге де үйлердің құжаттары тексеріліп рейдтік шаралар жиі ұйымдастырылуда.

АЙҒАҚ-АҚПАРАТ