МЕГАПОЛИСТІҢ ЖАҢА БАС ЖОСПАРЫ ЖАСАҚТАЛДЫ

Шымкент қаласының жаңа бас жоспары жасақталды. Жоспарға сәйкес мегаполисте 2035 жылға дейін 3 айналма жол мен жеңіл рельсті транспорт салу көзделуде. Яғни, болашақта қала тұрғындары ЛРТ-мен жүруі мүмкін. Одан бөлек, бас жоспарда 5 ауданның даму нүктелері анықталып, стратегиялық өркендеу жоспарлануда. 6 айда атқарылған жұмыстарға есеп беріп, алдағы жоспарды таныстыру мақсатында Шымкент қаласы сәулет, қала құрылысы және жер қатынастары басқармасы басшысының міндетін уақытша атқарушы Нұрбол Жүнісбеков брифинг өткізді. Бақ өкідерімен кездесу барысында спикер 2023 жылғы 5 индикатормен қысқаша таныстырып өтті. Оның бірінші және маңыздысы қаланың бас жоспары. Жасақталған жаңа жоба қоғамдық талқылаудан өтіп,  жергілікті мәслихаттың шешімімен бекітіліп, қазіргі уақытта үкімет қарауында. Бас жоспардың басты ерекшелігі ЛРТ-ның салынуы.

Шымкент қаласында өңірлік геоақпараттық жүйесі  құрылды. Бұл жүйе 2 жыл бойы дайындалып, биыл наурыз айнан бастап іске қосылды. Сонымен қатар, 3-индикатор да осы геоақпараттық жүйеге қатысты. Қаладағы  пайдалануға берілген тұрғын үйлер индикаторына да осы басқарма жауапты. Биылғы жылғы жоспар бойынша 1 млн 75 мың шаршы метр тұрғын үй пайдалануға берілген

Қаланың дамуының басты кедергісі бұл заңсыз құрылыс нысандары. Мұндай ғимараттар қалада аз емес дейді басқарма басшысы. Ол тізімде тұрғын үйден бастап кәсіпкерлік нысандары да бар.

Күннен күнге дамып келе жатқан мегаполисте жаңа жолдар мен мемлекеттік нысандар көптеп салынуда. Сондықтан да кейбір жер телімдерін мемлекет меншігіне алуға тура келетін жағдайлар орын алады. Мұндай нысандар үшін бүгінде бағалау жұмыстары жүргізілуде.

Сонымен қатар, қаладағы 5 ауданды стратегиялық бағытта өркендету мақсатында әр ауданның даму нүктелері анықталды. Бұл бас жоспарға да енгізілген. Нұрбол Әбдірахманұлы барлығына жеке тоқталып, танстырып өтті. Айта кетейңк, Әл-Фараби ауданында орналасқан Ескі қала мөлтек ауданын сүріп, қайта қала құру да  жоспарда бар екен.

Құрылыс жұмыстары 7 кезеңнен тұратын Қонаев даңғылын салу барысында Сәуле мөлтек ауданындағы 236 тұрғын үй құрылысқа кедергі келтіруде. Бүгінгі күні баспанасын мемлекет меншігіне қайтаруға қарсы болғандармен сот жүруде.

Айғақ-ақпарат