Ерекше қарым-қабілетпен туылған балалардың дүниетанымын кеңейтіп, өмірге деген бейімділігін арттыруда ата-ананың еңбегі басым болғанымен, ол аздық етеді. Осы санаттағы отбасының балаларын жан-жақты қолдап, білім беріп, олардың ерекшеліктеріне қарай дамытатын орталықтардың қатары көбейіп келеді. Сондай-ақ, олар заман талабына сай қайта жаңғырып жатыр.

Мемлекет басшысы Қасым-Жомарт Тоқаев қоғамдық кеңес отырысында ерекше білім беруге қажеттілігі бар балаларға жан-жақты кешенді оңалту шаралары қажет екенін айтты. Сонымен бірге елімізде балалар скринингін жақсарту, алғашқы медициналық-санитарлық көмек көрсету ұйымдары жанындағы әлеуметтік қызметтер жұмысын күшейтуге арнайы тапсырма берді.

Бүгінгі таңда Шымкент қаласының білім басқармасына қарасты «Оңалту орталығы» коммуналдық қазыналық мекемесіне күрделі жөндеу жұмыстары жүріп жатыр. 2023 жылдың сәуір айынан қолға алынған жұмыстар халықаралық стандарттарға сай құрылыс нормалары бойынша жүргізілуде. Қала әкімі Мұрат Әйтенов Ә.Молдағұлова көшесі 8 Б мекен-жайда орналасқан «Оңалту орталығы» құрылысының жай-күйімен танысу үшін аталған нысан басында болды. Мұрат Дүйсенбекұлы құрылыстың жұмыс сапасын бақылап, жауапты және мердігер мекеме басшыларына кестеден кешікпеуді ескертіп өтті.

Ғимараттың іргесі 1975 жылы қаланған. Жарты ғасырға жуық тарихы бар нысанда қазір 167 оқушы ерекше білім берумен қамтылған. Олар дамуға, білім алуға және қоғаммен бірге қалыпты өмір сүруді қалайды, әрі құқылы. Уақыт кеңістігіне сай ол балалармен жұмыс істеу технологиясы, методикасы өзгеріп келеді. Аталған ерекшеліктерді ескеріп, баланың қабілетіне қарай өздерін жетілдіріп отыратын ұжымда 56 педагог жұмыс істейді. Логопед пен психолог кабинеттері, сенсор бөлмелері, израильдік технологиямен жасалған мультимедиялық білім беру жүйелері қайтадан жаңартылып, заманға сай  жабдықталуда. Оңалту орталығында 11 топ – құлақ және тіл мүкістігі бар, дамуы тежелген балалармен тығыз байланыста жұмыс істейді.  Бес қабатты ғимараттың күрделі жөндеу жұмыстары ағымдағы жылдың тамыз айына дейін аяқталады деп күтілуде.

Жаңартылған оңалту орталығы. Ал, шаһардағы №2 оңалту орталығы күрделі жөндеуден өтіп, заманауи қондырғылармен жабдықталды. Бүгінде озық үлгіде жаңартылған орталықта 3 жасқа дейінгі неврологиялық ауытқуы бар балаларға арналған ерте араласу орталығы іске қосылған. Жыл басынан бері медициналық ұйымда 826 бала ем алды.

Орталықта неврологиялық ақауы бар және отадан кейінгі кардиохирургиялық, ортопедиялық 18 жасқа дейінгі балалар оңалту ем-шараларын алады. Мұнда 113 қызметкер жұмыс істейді. Балаларға физиотерапиялық гидроәдіс, массаж, логопед, дефектолог, эрготерапевт,психолог қызметтері  көрсетіледі.

Педагог мамандары балалардың шығармашылығын дамытуға,  өз-өзіне қызмет көрсетуге көмектеседі.  Сондай-ақ, әлеуметтік дағдыларды дамыту жұмыстарын жүргізіп, мәдени-гигеналық дағдыларды  қалыптастырады. Балаларды күнделікті өмірге бейімдеуге көмектесіп, ата-аналарына үй жағдайындағы оңалту жұмыстарын үйретеді.

Жалпы елімізде ерекше балалардан бөлек, ата-аналары мен оқушыларға психологиялық-педагогикалық сүйемелдеу, қолдау жұмыстары да назарға алынып келеді. Мұндай қолдаулар арқылы ерекше балалар қоғамнан тысқары қалмай, қатарынан кем болмай өсетініне мүмкіндік мол.