«Айғақ» телеарнасының «Саяхат сұхбат» бағдарламасы мегаполистегі үздік телебағдарлама атанды. Қаланың бет-бейнесін, әр саладағы атқарылған жұмыс пен жоспарын жүйелеген бағдарлама өз көрерменін тапса, журналистердің кәсіби мерекесінде әкімдік тарапынан үздік деп танылды. Атаулы дата қарсаңындағы номинацияны шаһар басшысы табыстады.
Шымкент қаласының әкімі оңтүстік өңірінің ақпарат саласында табанды еңбек етіп келе жатқан журналистерді кәсіби мерекесімен құттықтады. Өз саласының кәнігі маманы атанған, халықтың тыныс-тіршілігінен бастап, руханият, саясат жайлы хабар жасайтын қалам иелеріне жылы лебізін жеткізді.
Әкімдік тарапынан үздік деп танылған номинациялар ішінде телеарнамыздың «Саяхат сұхбат» бағдарламасы бар. Қаладағы әр басқарма мен ауданның тізгінін ұстаған басшыларды сұхбатқа тартып, әрбір саланың жұмыс барысымен таныстырған жоба/бағдарлама «Үздік телебағдарлама» атағын алды. 28-маусым БАҚ-ның мерекесіне орай ұйымдастырылған шарада марапатты қала әкімі «Айғақ» телеарнасының бас редакторы Ұлжан Наушабаеваға табыстады.
Ақпарат айдынында қызмет етіп жүрген журналистер қауымын қаланың мәдениет басқармасы да құттықтады. Баспасөз, телеарна арқылы қоғамның дертін де, жетістігін де жеткізуші, уақытпен санаспай ақпарат тарататын 4-ші билік өкілдеріне құрмет көрсетті. Ардагер журналистерден бастап, қалам мен қағазды серік етіп бастаған жас тілшілер марапатталды. Осы орайда басқарма басшысы ақпарат пен мәдениет саласы бір-біріне етене жақын екенін айтып, алда жақсы жаңалықтармен елді қуантып, ұлттық мүддеміздің биігінен көрінеміз деді. Кәсібіне адал, медиа саласында маңызды жаңалықты жылдам жеткізуді мұрат тұтқан барша әріптестерге шығармашылық табыс тілейміз.
