АҚ ХАЛАТТЫЛАР АЛҒЫСҚА БӨЛЕНДІ

  Адам жанының арашасы — дәрігерлер. Ал, мемлекеттің басты байлығы — оның халқы. Сондықтан да, денсаулықты дамыту ісіне еліміз көп көңіл бөлуде. Шымкенттік тұрғындардың саулығын қамтамасыз ету мақсатында 15256 маман жұмыс жасайды. Әлемді дүр сілкіндірген корона індетінде жаны қиналғанның жанынан табылып, қаламыздың дәрігерлері өз біліктілігін танытқан еді. Ал бүгінгі шарада барша дәрігерлер мен ардагерлер бас қосып, салтанатты жиынның куәсі болды.

  Күні-түні тұрғындардың саулығын қамтамасыз ететін мамандардың жеткен жетістіктері мол. 2023 жылдың соңғы 4 ай қорытындысы бойынша мегаполисте өлім көрсеткіші 8,3%-ға, нәресте өлімі — 26,9 %-ға төмендеген. Ал ағымдағы жылы қаламызда ешқандай ана өлімі тіркелмеген. Медицина қызметкерлері күні қарсаңында антына адал ақ халаттылардың еңбегі ескеріліп, денсаулық сақтау министрлігінің төсбелгісімен марапатталды.

  Мемлекеттен бөлінген бюджетте медицина саласында оңынан игеріліп жатыр. Өткен жылы №1 қалалық емхананың балалар бөлімшесіне, №2 оңалту орталығына жөндеу жұмыстары жүргізілсе, биыл қалалық клиникалық аурухана ғимараттарына күрделі жөндеу жұмыстары жасалған. Қаламызда онкология, кардиология саласының мамандары өзге өңірмен салыстырғанда деңгей бойынша жоғары. Осылай деген басқарма басшысы медицина саласындағы бірқатар жетістіктерді тізбектеді.

  Дертпен күрескен мамандар жыл сайын біліктілігін шыңдайды. Сондай-ақ, қаламыздың жедел жәрдем дәрігерлері Қазақстан бойынша ең үздік атанған. Денге аулық, дертке шипа сыйлайтын медицина мамандарының рөлі әрқашанда маңызды болып қала бермек!