«ҚАЛА КҮН» МЕРЕКЕСІНДЕ ЖАҢА НЫСАНДАР АШЫЛДЫ

   Шымкентте Қала күні мерекесі қарсаңында жаңа нысандар пайдалануға берілді. Оның ішінде 5-еуі жастарға арналған әлеуметтік ғимараттар. Ашылу салтанатына қатысқан қала әкімі Мұрат Әйтенов шымкенттіктерді қала күнімен құттықтап, мегаполистің күн сайын дамып келе жатқанын алға тартты.
Шымкент қаласының мегаполис статусын алғанына биыл 5 жыл толды. 2200 жылдық тарихы бар көне қала осы күнге дейін сындарлы шақтардан өтіп, бүгінде еліміздегі шоқтығы биік бірден бір қалаға айналып отыр. Құрылыс жұмыстары қарқынды жүріп жатқан өңірде бүгін 6 нысан халық игілігіне беріліп отыр. Мәселен жастардың сұранысына орай Абай саябағы аумағынан скейт парк ашылды. Экстремалды спорт түрлерімен шұғылдануға арналған қоғамдық кеңістік қалада әзірге осы бір жерде ғана бар. Алдағы уақытта жаңадан салынатын барлық саябақтардың құрылыс жоспарына енгізілмек. Занауи талапқа сай жабдықталған скейт парк мегаполис жастарының уақытын тиімді пайдалануға мүмкіндік беретін орталыққа айналмақ.
Жастар үшін тағы бір жағымды жаңалық. Қала күні мерекесі қарсаңында №2 балалар саз мектебінің құрылысы аяқталып қолданысқа берілді. Бұған дейін 1958 жылы ашылған ғимаратта білім алған оқушылар бүгін заманауи өнер ордасына көшірілді. Қайта жаңарған мектепте 1164 оқушы 13 бағыт бойынша үйірмелерге қатысады. Балаларға білікті, академиялық-консерваториялық білімі бар 112 ұстаз сабақ береді. Ал мұндағы астпаптар арнайы Германия зауытынан тапсырыспен алынған.

«Қала күні» мерекесіне орай тағы бір әлеуметтік нысан пайдалануға берілді.  С.Королева атындағы №45 мектеп-гимназияның қосымша 300 орындық корпусының ашылу салтанаты өтті. Үш қабатты қосымша ғимараттың құрылысы былтыр басталған. Спорт залы, жаттықтырушы бөлмесі, психолог пен логопед кабинетімен қамтылған нысан заманауи құралдармен жабдықталған.  Қала күнімен тұспа-тұс келген ашылу рәсіміне Шымкент қаласының әкімі Мұрат Әйтенов қатысты. Айта кетейік, жазғы демалыс кезінде мұндағы мектеп жанынан балалар лагері ұйымдастырылған. Мектептен тыс уақытын тиімді пайдалану үшін лагерьге келген оқушылар бұл күні өз өнерлерін көрсетті, қылқалам туындыларын ұсынып, ән мен күйден әсерлі, әдемі көңіл-күй сыйлады.

Сонымен қатар, Бозарық шағын ауданындағыжаңа спорт мектебі пайдалануға берілді. №20 балалар мен жасөспірімдер спорт мектебінің ашылуына қатысқан қала әкімі Мұрат Әйтенов бұқаралық спортты дамытуға мүмкінлік беретін заманауи талапқа сай жабдықталған ғимаратты аралап көрді. Спортты серік еткен елдімекен жастары енді қала орталығына қатынамай жақын аумақтағы жаңа үлгіде бой көтерген нысанда спортпен шұғылданатын болады. Спорт мектебі екі ауысымда 10-23 жас аралығындағы 1000 баланы қабылдай алады. Бүгінде мұндағы түрлі үйірмелерге 500 бала қатысуда. Қызығушылық танытқан жастар үшін мектеп есігі ашық, қабылдау тегін. Алдағы жылдары осы секілді спорт мектептерінің санын арттыру көзделуде.
Қала күні қарсаңында көптен күткен «Оқушылар сарайы» ғимараты да пайдануға беріліп отыр. Мегаполистің кескін-келбетін айшықтайтын 500 орындық сәулетті ғимарат балалар шығармашылығын дамытуға жол ашады. Цифрлық жүйе мен қолайлылықты ұштастыра соғылған мекемеде балалар үшін барлық жағдай жасалған. 7 бағыттағы 35 үйірме оқушылардың сабақтан тыс бос уақыттарын тиімді үйлестіре отырып, қосымша біліммен қамтуға бағытталған. Сапалы жабдықталған ғимаратта балаңыздың білім алғанын қаласаңыз «Миндаль» қосымшасы арқылы кезекке тұрып, құжат тапсыруыңыз қажет. 2026 жылға дейін қаламызда осындай тағы 3 оқушылар сарайын салу жоспарлануда. Қазіргі уақытта Тұран ауданында бір өнер мектебінің құрылысы жүріп жатыр екен.
Барша шымкенттіктердің ортақ мерекесі — қала күні құтты болсын! Мегаполис жаңарып, жасарып, сәні мен салтанатына сай көркейе берсін.

АЙҒАҚ-АҚПАРТ