ЖАЗҒЫ ӨРТТІҢ АЛДЫН АЛУ ЖҰМЫСТАРЫ

Биыл Шымкент қаласының аумағында жыл басынан бері 62 өрт жағдайы тіркелді. Олардың материалдық шығыны 124 млн 952 мың теңгені құрап отыр. Өрттің салдарынан 8 адам қаза болған, жарақат алғандар жоқ. Орын алатын өрттердің 79 пайызы тұрғын үй секторы мен көлік өрттеріне тиесілі. Сонымен қатар, өрттің қауіпті кезеңі басталғалы бері 412 жану жағдайлары орын алып, оның ішінде 125 құрғақ шөп және 77 қоқыс жанған. Осыған орай, 2023 жылғы маусымда орман және дала өрттерінің туындау және оларды жою іс шаралар жоспарына сәйкес аудан әкімдеріне тиісті тапсырмалар берілді.

Қала аумағында жалпы республикалық маңызы бар автомобиль жолдарының бойында 53 шақырым, жергілікті автомобиль жолдарының бойларында 320,2 шақырым, орман қоры жерлерінде 300 шақырым және егістік алқаптарында 402,1 шақырым өртке қарсы минералды жолақ жырту жұмыстары жүргізілді. Орман қорын қорғау мақсатында осы екі шаруашылықтың балансында, жалпы 22 бірлік бейімделген техника және 186 өрт сөндіру құралдары мен 14 бірлік мотопомпа бар. Қазіргі таңда, жабдықтау мен адам құрамы дайындыққа келтірілген.