Былтырдан бері елімізде балалар мен жасөспірімдерге арналған шығармашылық үйірмелер мен спорт секцияларын жүзеге асыру үшін Артспорт платформасы іске қосылды. Шымкент қаласында жеке кәсіпкерлер есебінен балаларды спорт пен өнерге баулитын нысандар көптеп бой көтергені белгілі. Есесіне, мемлекет есебінен әр балаға қаржы бөлінеді. Десек те, осынау бағдарлама бойынша жан басына шаққандағы қаржыландырудың проблемалық мәселесі әлі көп.
Басталғанына бір жылдан енді асқан бұл бағдарламаның басынан қара бұлт арылмай-ақ келеді. Соңғы кездері балалардың игілігі үшін жасалып жатқан шаруаның жергілікті әкімдік тарапынан дұрыс ұйымдастырылмау фактілері жиілеп, мемлекет қаржысына қол сұғушылар көбейіп кеткен көрінеді. Артспорт бағдарламасында жұмыс істейтін кәсіпкерлердің проблемалары туралы Шымкент қалалық Кәсіпкерлер палатасында өткен кеңесте талқыланды.
Үшінші мегаполисте Artsport жобасы аясында 159 қызмет көрсетуші 540 үйірмені іске қосқан. Онда балаларды тоқуға, тігуге, билеуге, сурет салуға, тіпті зергерлік бұйымдар жасауға үйретеді. Бөлінген 900 млн 798 мың теңгеден бөлек, әкімдік тағы 1,5 млрд теңгеге жуық қаржы іздеуге мәжбүр болған. Осылайша, жобаны қаржыландыру көлемі 2 млрд 351 млн теңгені құраған. Оның өзінде бұл қаражат шілде айына дейін ғана жететін.
Одан кейін Мәдениет басқармасының бұрынғы басшысы 10 млн теңге жымқырды деген күдікпен ұсталып, тағы бір жанжал шыққаны бар. Арнайы комиссияның тексерісінен кейін кейбір үйірмелер қағаз жүзінде ғана жұмыс істегенімен, іс жүзінде талапқа сай келмейтіні белгілі болған. Ал әкімдіктің шілде-тамыз айларында атқарылған жұмыстарды қаржыландырудан бас тартуы жұмыс істеп тұрған өзге үйірмелер иесінің ашу-ызасын тудыртып еді. Бағдарламаны қаржыландыру мәселесі бойынша Шымкент қаласының Кәсіпкерлер палатасына Өнім берушілер — ЖК Шагеева А.В., «МастерЮг» ЖШС, ЖК Игамбердиев сияқты жеке кәсіпкерлер құқықтары мен заңды мүдделерін қорғау үшін жүгінді.
Бағдарлама аясында кәсіпкерлерге Шымкент қаласы бойынша бас-аяғы 600 миллион теңгеге жуық қаржы төленуі тиіс. Мәселенің жуырда шешіле салмайтыны анық. Тергеу амалдары кемі жарты жыл жалғасатын көрінеді. Ал оған дейін кәсіпкерлер жалдаған ұстаздары мен жаттықтырушыларының айлығын өздері төлеп, балаларды таратып жібермеудің амалын жасауына тура келеді.
