Шымкенттегі №23 мектепте оқу әр баланың арманы. Жарты ғасырдан астам тарихы бар оқу ұясы еліміздегі маңдайалды мектептің бірі саналады. Білім сапасы жағынан үздік санатты мектептермен дәрежесі тең. Тіпті, кейбір ата-аналар баласын осында оқыту үшін шалғайдан шаһарға көшіп келген екен.
«Зоя Космодемьянская атындағы №23 мектеп-лицейі Шымкент қаласындағы білімнің биігінен көрініп жүрген мектептің бірі. Тарихын 1968 жылдан бастаған білім ошағы еліміздегі үздік 100 мектептің қатарында. Қазіргі таңда мұнда 4552 оқушы білім алады. Мектеп басшысы Жанар Жорақызының айтуынша, ұрпағына сапалы білім бергісі келген ата-аналардың кейбірі ауылдардан арнайы осы мектеп үшін көшіп келген.
Тарихы өткен ғасырдан басталған ғимарат қазір жаңа кейіпке енген. Уақыттың талабы мен заманның ағымына орай жаңарған. Арнайы жабдықтар қойылған пән кабинеттері баланың теория мен практиканы қатар меңгеруіне сеп болады. Елдің ертеңгі тұтқасын тәрбиелеп жатқан мектепте 370-тей педагог бар. Олардың барлығы жоғары білімді. Ұстаздан үйреніп, ғылымда озық болған шәкірттер де бірқатар жетістікке жеткен.
Қоғамда қызу талқыға түсіп жатқан балаларға ыстық тамақ беру процесі бұл мектепте қалай? Басшының айтуынша 200 орынға арналған асханада оқушыларды тамақтандыруда ешқандай мәселе жоқ. Әр сынып кезекпен, мұғалімнің қадағалауымен ас ішеді. Сондай-ақ, баланы еңбекке баулитын шеберхана мен шынықтыратын спорт зал талаптарға сай. Арнайы жуынатын, киім ауыстыратын бөлмелері санитарлық талаптарға сай екені көрініп тұр. Шымкент қаласындағы үздік білім ошағының бірі өткен оқу жылының ҰБТ қорытындысы бойынша да жақсы нәтиже көрсеткен. Бітірушілердің 90 пайызы мемлекеттік грантты жеңіп алыпты. 
Бірлік бар жерде — тірлік бар. Зоя Космодемьянская мектебінің 4-ші директоры Жанар Жорақызы ұжымды басқарудағы, білімді ұрпақ тәрбиелеудегі педагогтың атқаратын рөліне тоқталды.
