Халықты инфрақұрлыммен қамтамасыз ету бүгінгі күннің маңызды мәселесі. Инфрақұрылым — тұрақты дамудың негізгі факторы және елдердің бәсекеге қабілеттілігінің негізгі кілті десек болады. Бәсекеге қабілеттілікті қамтамасыз ету үшін инфрақұрылымды дамыту деңгейінің маңыздылығы оның негізгі сипаттамасынан туындайды: ол әртүрлі жүйелердің (экономикалық, әлеуметтік және т.б.) жұмыс істеуін қамтамасыз ететін негіз болып табылады.
Бүгінде Шымкент қаласының жақын және шалғайда жатқан елді мекендері кезең-кезеңімен шешімін тауып келеді. Себебі, Инфрақұрылым аймақтың тұрақты экономикалық дамуының маңызды факторы болып табылады. Өткен аптада Қаратау ауданына қарасты Азат шағын ауданының тұрғындары қуанышқа бөленді. Көптеген күткен көгілдір отын имәселесі бұл шағын ауданды түбегейлі өз шешімін тапты.
Қала әкімі М.Әйтеновпен бірге халық қалаулылары, “ҚазТрансГаз Аймақ» АҚ Шымкент филиалы директоры С.Исмайлов және халық қалаулылары, “Қоғамдық кеңес” төрағасы Б.Әлтеев пен жергілікті тұрғындар, сондай-ақ, БАҚ өкілдері бүгінгі қуаныштың куәсі болды.
Шымкент қаласының әлеуметтік-экономикалық ортасының өміршеңдігі инфрақұрылымның даму деңгейі мен сенімділігіне тікелей байланысты. Сондықтан шаһардың нарықты инфрақұрылымдық тұрғыдан реттеу – мегаполистің экономикалық дамуының басты шарты.
Шағын ауданда 8,9 шақырым газ құбыры тартылып, жұмыс толық аяқталды. Нәтижесінде 519 абонент көгілдір отынмен қамтылмақ. Қазіргі уақытта «ҚазТрансГаз Аймақ» АҚ Шымкент филиалы тарапынан абоненттеу жұмысы жүргізілуде.
Биыл қала бойынша 15 нысанда газбен қамту құрылыс жұмыстары жүргізілуде. Жыл соңында Батыс, Арғымақ, Ақтас, Ақтас-2, Ақжар, Көкбұлақ, Нұртас, Тұран 2 кезек, Сәуле елдімекендері және Ақтас магистралды жүйелердің құрылысы аяқталады. Нәтижесінде 34 мыңнан астам адам табиғи газ жүйелеріне қосылмақ.
Қала басшысы күн суытпай абоненттеу жұмысын аяқтауды тапсырды.
Ал, Абай ауданына қарасты Солтүстік саяжай елдімекенінің халқы сапалы электр қуатына қол жеткізді. Бүгінде жұмыс толығымен аяқталып, тұрғын үйлерді мемлекеттік желіге қосу үшін абоненттеу жұмысы басталып та кеткен.
Қала әкімі аумаққа арнайы барып, тұрғындармен кездесті. Құрылыс барысында 4 773 электр бағанасы мен 70 трансформатор орнатылып, 145 шақырым электр желілері тартылды.
Бұған дейін Солтүстік саяжай елдімекені тұрғындары жекеменшік желіден сапасыз электр қуатын тұтынып келген болатын. Ең бастысы, осыған дейін тұрғындарымыз 1кВ электр қуаты үшін 30-35 ₸ төлеп келген болса, қазір ол баға арзандап, 17,96 ₸ түсті.
Енді тұрғындар қажетті құжаттарды «ОңтүстікЖарықТранзит» ЖШС мекемесіне өткізу арқылы мемлекеттік желіден электр тұтына алады.
Жалпы жұмыс нәтижесінде, Солтүстік саяжайдағы 5 784 абонент сапалы электр қуатымен қамтылмақ.
Айта кетейік, биыл сапалы электрмен қамту мақсатында 6 елдімекенде құрылыс жұмысы қарқынды жүруде.
Жыл қорытындысымен, Достық, Тұран, Нұртас, Сәуле, Жаңаталап елдімекендерінде құрылыс жұмысы аяқталып, 22 мыңға жуық халық сапалы электрмен қамтылуға мүмкіндік алады.
Жаңаталап тұрғын алабының тұрғындары да жуырда жарықпен қамтамасыз етіледі. Себебі, бүгінде «Жаңаталап» подстанция құрылысының 90% аяқталған. Былтыр елдімекеннің 6 мыңнан астам тұрғыны ауыз сумен қамтылған болатын. Ендігі кезек сапалы электр қуатында.
Қазіргі таңда жалпы ұзындығы 42,2 шақырымға электр желілері тартылуда, аяқталу мерзімі — қазан айының соңына жоспарланған.
Құрылыс жұмыстармен танысқан шаһар басшысы ауыл ақсақалдары мен қоғам белсенділеріне құрылыс жұмысымен қатар абоненттеу жұмыстарының жүргізілуіне жергілікті тұрғындарды жұмылдыру керектігін айтып өтті.
— Абоненттеу, ескі жүйені жаңа жүйеге қосуға да уақыт кетеді. Сондықтан құжаттарды қазірден бастап дайындауға кірісіңіздер. Ал жұмыстың мерзімінде және сапалы орындалуы біздің бақылауымызда,-деді әкім.
Бұдан бөлек биыл 2 көше, атап айтқанда 1,5 шақырымды құрайтын Жұманов және Айдарқұл көшелеріне жарық орнатылуда. Әзірге жұмыстың 20%-ы орындалды.
Жалпы электр қуатымен биылғы қамтылу көрсеткіші 98 пайызға болса, 2023 жылы мегаполистегі барлық елдімекендер 100 пайыз сапалы электр қуатымен қамтылатын болады.
Қаланың, облыстың, елдің инфрақұрылымын дамыту – экономиканың дамуының кілті ғана емес, оның «айнасы». Ең алдымен, инфрақұрылымды дамыту негізгі капиталға инвестиция тартуға көмектеседі, құрылыс, өнеркәсіп, сауда және экономиканың онымен байланысты салаларының дамуына ықпал етеді.