Шымкент қаласының біртұтас дизайн кодын енді жергілікті мәслихат депутаттары бекітетін болады. Арнайы ереже арқылы шаһардың заманауи келбеті қалыптасып, жайлы, қолжетімді және экологиялық тұрғыдан таза қала кеңістігі құрылады. Бұл туралы іссапармен келген сенаторлар мәлімдеді.
8-шақырылымның 3-ші сессиясын аяқтап, маусымдық демалысқа шыққан сенаторлар қазіргі таңда өңірлерді аралап жүр. Сайланған аймақтарындағы өзекті мәселелерді көзбен көріп, бөлінген бюджеттік қаржының тиімді жұмсалу барысын бақылауда. Осы мақсатта Сенат депутаттары Нұрлан Бекназаров пен Айгүл Қаппарова мегаполиске келді. Сапар барысында олар алдымен жергілікті мәслихат депутаттарымен және қоғамдық кеңес мүшелерімен кездесті. Кездесуде Шымкенттің әлеуметтік-экономикалық дамуына қатысты Сенат қабырғасында қабылданған заңнамалық бастамалар мен ұсыныстар сөз болды. Ал, Айгүл Жарылқасынқызының айтуынша, қабылданған заң негізінде енді мегаполистің сәулеттік келбетін біріздендіруге, яғни бірыңғай дизайн кодын енгізуге жол ашылды. Бұл қаланың сыртқы кейпін жүйелеуге, рұқсат етілмеген жарнама, ретсіз маңдайшалар мен көзге оғаш архитектуралық шешімдердің алдын алуға мүмкіндік береді.
Мәслихат отырысында денсаулық сақтау мен ғылымға қатысты бірқатар маңызды ұсыныстар айтылды. Атап айтқанда, депутат Бақытжан Позилов сақтандыру жүйесін жетілдіру керектігін жеткізсе, Дария Қожамжарова шаһардағы ғылым, ғалымдарға қолдау керегін сөз етті.
Кездесу соңында сенаторлар мәслихат депутаттары және қоғамдық кеңестің мүшелерімен бірлесе отырып, айтылған мәселелерді шешу бағытында жұмыс істеуге дайын екендерін жеткізді. Олар ел дамуындағы әрбір заңның өңірлік тәжірибеде тиімді жүзеге асуы үшін кері байланыс маңызды екенін атап өтті.
