Азық-түлік қорын ұлғайту, оның қолжетімділігін қамтамасыз ету — еліміздегі өзекті мәселенің бірі. Базардың бағамы қалтаның қаражатына қарамай тұрған шақта, әлеуметтік тауарлар әлеуеттің әжетіне жарап тұр. Тиісінше, соңғы уақытта сауда сөрелеріндегі әлеуметтік заттардың әлденешесіне шектеу де қойылуда. Ол қандай тауарлар?
Баға тұрақтылығын сақтау үшін күн сайын мониторинг жүргізіліп, реттеу жұмыстары жасалып жатыр? Алайда, одан нәтиже шығып жатыр ма? Азық-түлік себетіне негізгі жиналатын — ет, көкеніс, дәнді дақыл мен қант қымбаттады. Әлеуметтік тауарлардың бағасын бағамдап, күнделікті азық-түлікпен салыстыру мақсатымен қаладағы ірі сауда орталығына бардық. Қатар тізілген бөлімдер арасында әлеуметтік деп жазылған, үкімет қаулысына сай бекітілген 19 тауар тұр. Бағасы да сәйкесінше біршама төмен.
Біз талдау жасаған «Gramad» сауда желісінде әлеуметтік маңызға ие заттардан бастап күнделікті тұтынатын тауарлардың барлығы тұр. Мекеме қызметкерлерінің мәліметінше алдын-ала 1 айға жететін қор сақталады екен. Сондай-ақ, бағаны тұрақтандыру бойынша сатылып жатқан тауардың құны төмен болғанымен, сапасына шағым айтуға келмейді дейді.
Сауда орталығының жанындағы қоймасы да әлеуметтік тауарларға толып тұр. Дегенмен, пайда ойлаған делдалдардың жөнсіз әрекетіне жол бермеу үшін қант пен сұйық майға шектеу қойылған. Құмшекерді 2 келіден артық алмайтыныңыз секілді, сұйық майға да 2 литрлік өлшем қойған. Мегаполистегі бірқатар сауда нысандарына әлеуметтік тауардың тұрақтылығын сақтау үшін 2018 жылдан бері 7,7 млрд теңге бөлінген. Жауапты мамандардың сөзінше, әзірге оның ешқайсысы қайтарылмаған, айналымда жүр.
