ӘЛЕУМЕТТІК ИНФРАҚҰРЫЛЫМ — ҚАЛА ҮШІН МАҢЫЗДЫ

    Әл-Фараби ауданында  жыл басынан бері жалғасқан халықпен кездесудің нәтижесінде 199 нақты мәселе қаралған. Олардың басым бөлігі әдеттегідей,  әлеуметтік инфрақұрылымға қатысты. Мегаполистің тарихи өзегі саналатын ауданның жеткен жетістігі қайсы? Шаһардың орталық ауданын басқаратын Рашид Мыңбаев арнамызға сұхбат беріп, бүгінгі даму бағытын баяндады.

     2000 жылдық тарихы бар Шымкенттің көне қала орнында орналасқан — Әл-Фараби ауданы. Басым бөлігі көп қабатты тұрғын үйден тұратын мекенде қашан да болмасын әлеуметтік инфрақұрылым саласы өзекті. Тазалық, су, жарық, жылу мәселесі 100 пайыз шешілмеген. Жылдық жоспарға сай жүріп жатқан жұмыстар мен бес жылдық даму бағытын бағамдаған аудан әкімі елдімекендердің актуалды тақырыптары қашан шешім табатынын айтты.

    Аудан құрамына тарихи орындар — Қошқар ата өзені, Кең баба этносаябағы, Орталық саябақ, Дендросаябақ, балалар темір жолы кіреді. Оларды күтіп-баптау, тазалық жұмысын жүргізуге қатысты әкімнің де айтары бар.

    Ауданда сондай-ақ, атаулы әлеуметтік көмек алушылардың қатары азайған. Мысалы, өткен жылдың статистикасына сүйенсек, 4852-ге төмендепті. Ал, балалар жылы қарсаңында базарлық ретінде жаңа нысандар ашылған.

    Әл-Фараби ауданындағы үлкенді-кішілі атқарылып жатқан жұмыстарды жікке бөліп, түсіндірген әкім халықпен кері байланыстың, жүзбе-жүз кездесудің арқасында іс ілгері басады дейді. Сөз басында айтылған 199 мәселенің қалған 64-і орындалу барысында. Ал, 14-і келер жылдың еншісіне берілген.