МЕГАПОЛИСТІҢ 8 МЕКТЕБІ ҮЗДІКТЕР ҚАТАРЫНДА

Шымкент қаласының 8 мектебі «Үздік олимпиадалық мектеп» номинациясы бойынша республикада жүздіктің қатарында. 2021-2022 оқу жылында мегаполистің бес жүзден астам оқушысы халықаралық, республикалық деңгейдегі сайыстарда топ жарған. Осы орайда салтанатты «Дарынды балалар фестивалінде» жүзден жүйрік, мыңнан тұлпар озаттар марапатталды. Оларға бағалы сыйлықтар мен алғыс хат табысталды.

  2021-2022 оқу жылын Шымкент қаласының мектептері жемісті жеңіспен аяқтамақ. Оқу ұяларының 500-ден астам шәкірті биыл халықаралық, республикалық деңгейде топ жарған. Осы орайда шығармашылық оқулар мен пән олимпиадаларының қалалық кезеңінің 300 оқушысы қатысқан «Дарынды балалар фестивалі» өтіп, жас дарындар марапат төрінен көрінді. Сондай-ақ, оқу жылының үлкен жетістігі ретінде мегаполистегі  8 мектептің «Үздік олимпиадалық мектеп» номинациясы бойынша жүздіктің қатарына қосылғандығын айтамыз.

Үшінші астананың айбынын асқақтатқан байқаулар: ХІІ халықаралық Ө.Жолдасбеков атындағы математика және механика зерттеу жобалар конкурсынан  ІІ-ІІІ орын, «Ғылым әлемін ашамыз» халықаралық зерттеу байқауынан ІІ-ІІІ орын, Халықаралық дәрежедегі информатикадан ХІІІ Еуразиялық олимпиададан бір оқушы ІІІ оын, ХVIII Халықаралық Жәутіков олимпиадасынан бір оқушы ІІІ орын, Халықаралық ХХІ «Жібек жолы» олимпиадасынан 2 қола медаль,  республикалық жалпы білім беретін пәндер бойынша олимпиададан 9 алтын, 14 күміс, 25 қола медаль, республикалық жалпы білім беретін пәндер бойынша ғылыми жобалар конкурсынан 4 алтын, 1 күміс, 9 қола иеленген.  Түрлі сайыстарда қаланың мәртебесін қорғаған жас ғалымдар, жас дарындар балалар жылы қарсаңында жасалып жатқан мүмкіндіктерге дән риза.

«Жалын» мектебінің оқушысы Абылай Таубайұлы: — Ұстазым Ахан Арапатұлының дайындауымен бірнеше облыстық, қалалық олимпиадалардың жеңімпазы атандым. Осы жетістіктерім ескеріліп, марапатқа лайық деп танылғаныма шексіз қуаныштымын. Жастардың болашағы мен біліміне аса мән беріп отырған мемлекет басшысына барлық оқушылардың атынан алғыс айтамын,-дейді.

— Балалар жылы қарсаңында ұйымдастырылып жатқан түрлі байқаулар мен сайыстар бала бойына шабыт сыйлап, биылғы жыл жемісті жыл болуда,- дейді, «Дарын» орталығының директоры Раушан Жеренова.

Балалардың қуанышын бірге бөліскен Шымкент қаласы әкімінің бірінші орынбасары Шыңғыс Жұмабекұлы елдің ертеңгі тұтқаларын толағай жетістігімен құттықтап, бұл — үлкен жетістіктердің алғашқы қадамы болсын деп, тілек білдірді.