Түркістан қаласындағы «OLYMPIC CENTR» спорт кешенінде садақ атудан ересектер арасында Қазақстан чемпионаты басталды. Ең тәжірибелі мергендер сайысына еліміздің барлық өңірінен іріктелген 10 команда, 250-ге жуық құралайды көзге атқан мергендер жиналып, мықтыны анықтауда.
Олимпиада ойындары мен әлем чемпионаттарында талай мергендерді танытқан бұл спорт түріне соңғы кездері қаракөздеріміздің арасында қызығушылық артып отыр. Жарыстың бас төрешісі Ольга Нидің айтуынша, биылғы Қазақстан чемпионатына еліміздің садақ атудан ұлттық құрама мүшелері түгел қатысуда.
Түркістан облысының намысын қорғаған Бунед Мирзаметов, Абдукарім Абдулаев сынды талантты садақ атушылар –облысымыздың мақтаныштары. Қазақстан чемпионатының ашылу салтанатына арнайы қатысқан Түркістан облысының дене шынықтыру және спорт басқармасының басшысы Қанат Жолдықараев пен еліміздің ұлттық олимпиада комитетінің садақ ату бөлімінің басшысы Еділ Темірбеков спортшыларымызға сәттілік тіледі. Сонымен қатар, республикалық чемпионатқа Қожа Ахмет Яссауи атындағы Халықаралық Қазақ-Түрік университетінің ректоры, Түркістан облыстық садақ ату, арбалет және дартс федерациясының президенті Жанар Темірбаева да талантты саңлақтарымызға қолдау көрсетті.
