Тәуелсіздік – бабалар аңсауы, ұрпақтың қолы жеткен киелі кезең. Еліміз тәуелсіздіктің бесігінде тербелгелі 30 жыл. Отыз жыл ішінде Қазақстан етек-жеңін жиып, шекарасын бекітіп, өз алдына дербес, зайырлы ел болды. Бұл атадан келе жатқан ұлы жеңістің жемісі. 1991 жылы 16 желтоқсанда егемендігін алған еліміздің өз президенті, ұлты мен ұлысы, салты мен дәстүрі, мәдениеті мен экономикасы қалыптасты. Айтулы датаның негізінде Үшінші мегаполисте «Ел бақытын тербеткен Тәуелсіздік» атты шарасы өтті.
Жиын барысында ҚР Президенті Қасым-Жомарт Кемелұлы Тоқаевтың тапсырмасы бойынша Мемлекеттік хатшы Қырымбек Көшербаев Шымкент қаласына жұмыс сапарымен келіп, Тәуелсіздіктің 30 жылдығына арналған салтанатты іс-шараға қатысты.
Қырымбек Көшербаев Қазақстанның Тәуелсіздік жылдарында жеткен жетістіктерін, еліміздің басынан өткерген түрлі қиындықтар мен сынақтар жайында айтып өтті. Мемлекетіміздің нығайып, әлеуметтік-экономикалық дамуына, әлемдік аренада өзіндік орын алуына ҚР Тұңғыш Президенті – Елбасы Нұрсұлтан Әбішұлы Назарбаевтың ерен еңбек сіңіргенін жеткізді. Осындай жасампаз жолды Мемлекет басшысы Қасым-Жомарт Кемелұлы Тоқаев «Сабақтастық. Әділет. Өрлеу» принципімен, «Халық үніне құлақ асатын мемлекет» тұжырымдамасымен лайықты жалғастырып жатқанына тоқталды.
Мұнансоң 30 жыл ішінде Шымкент қаласында атқарылған жұмыстардың біршамасына тоқталған қала әкімі М.Әйтенов жыл басынан бері жасалған жұмыстарды баяндады.
Сондай-ақ аталған мерекелік шарада еңбегімен ел алдында көрінген бірқатар азаматтар мемлекеттік наградалармен марапатталды. III дәрежелі «Барыс» орденімен Ханбибі Есенқарақызы,
«Парасат» орденімен Шерім Медеуов мараптталды. Оған қоса, қаланың көркеюіне еселі еңбек сіңірген азаматтар «Құрмет» ордені мен «Ерен еңбегі үшін», «Шапағат» медальдары және Қазақстан Республикасының Құрмет грамотасы табыс етілді.
