Биыл күш атасы Қажымұқан Мұңайтпасұлының туылғанына 150 жыл толып отыр. Даңқты палуан 1871 жылы қазіргі Ақмола облысының Қараөткел ауылында дүниеге келген. Осыған орай Ордабасы ауданының бір топ өнерпаздары Ақмола облысына аттанды. Мұндағы мақсат даңқты палуанның 150 жылдығын мерекелеу аясында күрес өнерінің шебері туылған аймаққа барып концерттік бағдарлама ұсыну болып табылады. Ордабасы ауданы әкімінің қолдауымен іске асырылып отырған бұл сапарға аудандық мәдениет және тілдерді дамыту бөлімінің басшысы бастаған 40 шақты жергілікті өнерпаздар бара жатыр. Үш күнге жоспарланған сапар аясында өнер өкілдері Ақмола облысына арнайы әзірлеп бара жатқан концерттік бағдарламалары мен қойылымдарын ұсынбақ. Аудан орталығы Темірлан елді мекенінен жолға шыққан мәдениет саласы қызметкерлерін аудан әкімінің орынбасары Азат Оралбаев сәт-сапар тілеп шығарып салды.
Қажымұқан Мұңайтпасұлы — Қазақ халқының тарихындағы тұңғыш кәсіпқой балуан. Тұтас ғұмырын күрес өнеріне арнап, ұланғайыр жері мен өршіл халқын бірінші болып өзге жұртқа паш еткен. Қажымұқан Мұңайтпасұлы
орасан күштің иесі, күрестің бірнеше түрінен әлем чемпионы атанған тұңғыш қазақ алыбы! Теңдессіз өнерімен жер шарын аралап 54 мемлекетте күреске түсіп, 48 медаль олжалаған даңқты палуан.