ЕРІКТІЛЕРДІҢ ЕҢБЕГІ ЕЛЕНДІ

Маңғыстау мен Қызылорда облысында құрғақшылыққа байланысты көмекке қол ұшын берген ерікті топ өкілдерін ҚМДБ-ның өкілдері марапаттады.
Игі шара барысында ҚМДБ-ның Шымкент қаласының бас имамы Бақдәулет қажы Абдрахманов, Шымкент қаласы дін істері басқармасының басшысы Әлжан Тұяқбаев және дінтанушы Мұхамеджан Естеміров қатысып, қуаңшылық қысқанда қарайласқан азаматтарға алғыстарын білдірді.

Жақында жарыққа шыққан “Ихсан — рухани тәрбие негізі” кітабының мазмұнын жиналған жамағатқа таныстырып, тұсауын кесті.
⁃ Адами құндылықтарға негізделіп жазылған бұл еңбек оқыр­манның рухани өмірі үшін пайдалы болмақ. Қазіргі күрделі кезеңде бізге қажеттісі – рухани жан дүниеміздің бастауы болған тәрбие ілімі. Мұны Ихсан ілімі дейді. Сөздің мағынасы — жақсылық жасау деген ұғымды білдіреді. Сондықтан айналамызға мейіріммен қарап, рухани ой-өрісі кемелденген, ізгі қоғамның мүшелері болайық,- деді Шымкент қаласының бас имамы Бақдәулет қажы Абдрахманов.

Қиыншылық кезінде бір жағадан бас, бір жеңнен қол шығарып, елді бірлікке ұйыстырып, батысқа көмек жіберген Біржан Байтуов, Құрмет Талапқазы, Бекмұрат Анарбаев, Нұржан Жақсылық бастаған еріктілердің еңбегі еленіп, марапат-құрметке бөленді.
⁃ Ел басына түскен нәубет — бәріміз ортақтасып көтеретін міндет,- деген Біржан Байтуов еңбектің ескерусіз қалмағанына алғысын білдірді.