Төлеби ауданындағы “Төлеби отбасы үлгісіндегі балалар ауылы” КММ-де игі іс бастау алды. Израиль мемлекетінің заманауи озық технологияларды тиімді пайдалана отырып, балалар үйінің ауласынан жаңбырлатып суару жүйесін қолданып, қияр, қызанақ секілді өсімдіктер егілді.
Израиль Елшісі Түркістан облысы климатының жайлылығы мен топырағының құнарлылығын ескеріп, жаңбырлатып суару жүйесі бойынша алда тұрған ел Төлеби ауданындағы балалар ауылынан жаңа жобаны бастады.
— Балаңа балық берме, қармақ бер демекші, балалар ауылынан мұндай жүйені енгізудегі мақсатымыз — балаларды еңбекке баулу, өз жерінен өнім алып, пайдасын балалар көрсе дейміз. Облыстарыңыздың климаты біздің елмен ұқсас келеді. Сондықтан да бұл жоба сіздердің жерлеріңізден де оң нәтиже береді деп ойлаймын,- дейді Израильдің Қазақстан Республикасындағы Елшісі Лиат Вексельман.
Сондай-ақ, табиғаты ыстық оңтүстік аймақта су тапшылығы орын алады. Бұл технологияның артықшылығы — су ресурстарын реттеу, ылғалды үнемдеуге де пайдасы зор.
Жалпы бұл технология шет мемлекеттерде өсімдіктерді тамшылатып суару әдісімен жылыжайларда, сондай-ақ аспалы бақтарда өсіру тәсілі кең қолданыста. Суарудың мұндай түрі тыңайтқышты да, суды да қажет мөлшерде пайдалануға мүмкіндік береді.
Игілігі мол бастама соңында Израильдің Қазақстандағы Елшісі балалар үйінің ауласындағы естелік кітабына жылы лебізін білдіріп, қолтаңбасын қалдырды.
