ЕГІЗБАЕВТЫҢ ЕСІМІ ҰМЫТЫЛМАЙДЫ

Түркістан облысында «Медицина қызметкерлері күніне» орай өңір дәрігерлері марапатталды. Ең басты құрмет медицина ғылымдарының кандидаты, 94 ғылыми еңбектің авторы, сала үздігі, өз кәсібінің майталманы, 58 жасында мезгілсіз өмірден өткен Мұқан Кеңесбекұлына арналды. Өзі өмірден өтсе де, есімі мен еңбегі ұмытылмайтын азаматқа Түркістан облысы әкімінің шешімімен «Облысқа сіңірген еңбегі үшін» төсбелгісі тағайындалған.

Ерекше құрмет медалін облыс әкімінің орынбасары Арман Сәбитов марқұмның әкесі Кеңесбек Егізбаевқа тапсырды. Айта кетейік, Мұқан Кеңесбекұлы Арыс қаласындағы әскери бөлімде болған жарылыста  зардап шеккен азаматтарға шұғыл медициналық көмек көрсетуде штабтың төрағасы ретінде ерекше көзге түсіп, халықпен бірге бола білді.

Сондай-ақ, марапаттау кешінде біліктілігі және кәсібилігімен көзге түскен дәрігерлер «Үздік хирург», «Үздік терапевт», «Үздік акушер-гинеколог», «Үздік педиатр», «Үздік жалпы тәжірибе дәрігері, «Үздік медициналық мекеме» сынды 6 аталым бойынша марапатталды.