Қазақстанның Бас мемлекеттік санитариялық дәрігерінің қаулысына сәйкес Алматы қаласының әуежайында ағымдағы жылдың 21 мамырынан «Ashyq» пилоттық жобасы іске асырыла бастады. Жоба жұмысы бекітілген алгоритмдерге сәйкес жүргізіледі, деп хабарлайды ҚР Денсаулық сақтау министрлігінің баспасөз қызметі.
Алгоритмнің талаптарына сәйкес азаматтардың Алматы қаласы әуежайының ғимаратына кіруіне рұқсат жолаушы арнайы QR-кодты сканерлеп, оның өз мәртебесін анықтау үшін әуежай қызметкеріне кіреберісте ұсынған жағдайда жүзеге асырылады.
Жолаушыларға мәртебе «ПТР-зерттеулердің бірыңғай интеграциялық порталы» және «ҚР Денсаулық сақтау министрлігі COVID-19 бақылау орталығы» ақпараттық жүйелеріндегі мәліметтерді салыстыру негізінде беріледі.
Атап айтқанда, «Жасыл» мәртебе жолаушыға еш кедергісіз қозғалуға мүмкіндік береді. Бұл жолаушының мәліметтер базасында COVID-19-ға ПТР-тестілеуден 72 сағаттан аспайтын уақыт бұрын өтіп, теріс нәтижесі бар адам ретінде сақталғандығын білдіреді. «Көк» мәртебе ПТР-тестілеу нәтижесінің жоқтығын көрсетеді. Бұл азаматтар науқастармен байланысқа түскен деп саналмайды. Аталмыш мәртебесі бар жолаушылар ПТР-тесттің нәтижелері талап етілетін орындардан басқа барлық жерде еркін қозғала алады. Ал «Сары» мәртебе науқаспен байланысқа түскен адамдарға беріледі. Олардың азық-түлік алуына немесе үйдің жанындағы дәріханаға баруына рұқсат етілсе, басқа қоғамдық орындарға баруына тыйым салынады. КВИ-ға ПТР-тест тапсырып, оң нәтиже алған жолаушы «Қызыл» мәртебеге ие болады. Бұл мәртебенің иелері оқшауланудың қатаң режимін сақтауы тиіс.
Жолаушының смартфоны болмаған жағдайда, әуежай қызметкері азаматтың келісімімен ақпараттық жүйеде оның ЖСН тексеріп, мәртебесін біле алады.
Шетел азаматтарының мәртебесі паспорт нөмірін енгізу арқылы тексеріледі.
«Ashyq» жобасын іске қосу қызыл және сары мәртебесі бар жолаушылардың аумаққа өтуіне жол бермеу арқылы әуежайда және әуе кемесінің бортында жолаушылардың қауіпсіздігін қамтамасыз етуді көздейді.
Еске салайық, «Ashyq» пилоттық жобасы ағымдағы жылдың 12 мамырында Нұр-Сұлтан халықаралық әуежайында іске қосылған болатын. Бүгінгі таңда жолаушылардың мәртебесін анықтау республиканың екі әуежайында жүзеге асырылады.
