“ҚУАТБЕКОВ ОҚУЛАРЫ-1: ТӘУЕЛСІЗДІК ТАҒЫЛЫМЫ” ХАЛЫҚАРАЛЫҚ КОНФЕРЕНЦИЯСЫ ӨТУДЕ

Тәуелсіздіктің 30 жылдығы мерейтоймен ғана шектелмейді. Мемлекет басшысы: — Әрбір шараны елге пайдасы тиетін нақты істерге ұластыру қажет. Экономика, әлеуметтік сала, білім, ғылым және басқа да бағыттар бойынша тың жобалар қолға алынады,-деген болатын. Осы бойынша А.Қуатбеков атындағы Халықтар достығы университетінде “Қуатбеков оқулары-1: Тәуелсіздік тағылымы” атты Халықаралық ғылыми-теориялық конференциясы өтті.

Университет ректоры Рабиға Қуатбекова бүгінгі конференцияда “Қуатбеков оқуларының” тұсауы кесілетінін айтып, білім ордасының жеткен жетістіктерімен бөлісті. Жиынға Түркістан облыстық мәслихатының депутаттары Дулат Әбіш, Өмірзақ Мелдеханов қатысып, оқу ордасына деген ақжарма тілектерін айтты.

Халықаралық деңгейдегі жиында аталған университеттің химия ғылымдарының кандидаты, профессор Жамалидин Махмудов “Тұқымдарды дезинфекциялау және пестицидтік препараттарды алу технологияларын жасау” тақырыбында баяндама жасады. Бұл бойынша дайындаған жобасын түсіндіріп, қазіргі уақытта осы жобамен Израиль, БАӘ, Ресей, Польша елдерімен екі жақты келісімдер жүргізіліп жатқандығын айтты.

Ғылыми-зерттеу баяндамаларының тақырыптары  өзекті әрі қызықты болғандықтан талқылау белсенді түрде өтіп жатыр. Оффлайн және онлайн режимде болып жатқан конференцияға Малайзия, Мәскеу, Өзбекстан, Түркия, ҚХР, Польша, Әзірбайжан, Тәжікстан елдерінің ғылым докторлары, профессорлар қатысуға ниет білдіріп, ғылыми жобаларын таныстыруда.