Азаматтардың қауіпсіздігі басты назарда

Ел азаматтарының қауіпсіздігін қадағалау – негізгі міндеттің бірі. Сол мақсатта шаһарда «Бүкіләлемдік Азаматтық қорғаныс күніне» орай ашық есік күні өтті.  Абай ауданы Төтенше жағдайлар басқармасының ұйымдастыруымен мектеп оқушыларына оқу-тәжірибелік жұмыс барысы көрсетілді. Сонымен қатар шараға  өрт сөндірушілер, апаттық құтқару қызметкерлері қатысты.    Әр жылда жаңа ұранмен өтетін Дүниежүзілік Азаматтық қорғаныс күні биыл — «Ұлттық экономиканы сақтау үшін күшті Азаматтық қорғаныс» тақырыбында болды. Сала мамандары жастар арасында азаматтық қорғау ұғымын түсіндіріп, оны іске асыру жұмыстарын көрсетті. Дүниежүзілік Азаматтық қорғаныс күні 1990 жылдың 1 наурызынан бері атап өтіледі. Ондағы мақсат – төтенше жағдай мен соғыс уақытында азаматтардың қауіпсіздігін сақтау. Сонымен бірге, қазір күнделікті өмірдің өзінде түрлі төтенше жағдайлар орын алуда. Сол келеңсіз оқиғаларға жол бермеу – негізгі бағыты.                                                                                      Мектеп оқушылары техникалық құралдармен танысып, түрлі төтенше жағдай барысында көмек көрсетудің, қорғанудың тәсілдерін үйренді. Оқиғаны шынайы сезіну үшін мамандар білім алушыларға өздерін кейіпкер қылу арқылы апат кезінде қалай қорғану, көмектесу керектігін де көрсетті.

Азаматтық қорғаныс күнін атап өту Төтенше жағдай қызметкерлері тарапынан халыққа хабарлау, түсіндіру мақсатында жүргізіледі. Шара соңында «Ашық есік» күніне белсене қатысып, мамандардың сауалына дұрыс жауап берген оқушылар марапатқа ие болды.

Айғақ-ақпарат