Шымкенттегі құрылыс жұмыстарының 60 пайызы Қаратау ауданына тиесілі

Шымкент қаласында 2020 жүргізілген құрылыстың 60 пайызы Қаратау ауданына қарасты. Басым бөлігі тұрғын үй салуға бағытталған. Сонымен қатар, қалаға тартылған инвестицияның да 55,6 пайызы осы жаңа ауданға тиесілі. Қаратау ауданында жалпы 24 елдімекен бар. 247 мыңнан астам халық қоныстанған. Аудан әкімі Абзал Әліқұлов қорытынды есепте өңірдегі инфрақұрылым мәселесін бірінші орынға қоятынын айтты. Қаратау ауданының қорытынды есебіне қала әкімі Мұрат Әйтенов те қатысқан болатын.

Қаратау ауданы халқының 77 пайызы тәулік бойы сапалы ауыз сумен қамтылса, 12 пайызы кесте бойынша пайдаланады. Ал, 10 пайызы ауыз суды тасымалдап ішуге мәжбүр. Бұл қолайсыздықты жою мақсатында ағымдағы жылы бірнеше елдімекенге су құбырларын тарту жұмыстары жүргізілмек. Нәтижесінде Қаратау ауданының сапалы ауыз сумен қамтылуы 83,5 пайызға жетеді деп көзделуде.
Ауыз судан бөлек аудан аумағында жол құрылысы да кезек күттірмейтін мәселенің бірі. Қоныстанушылар саны күн санап артып келе жатқан өңірде жаңа көшелер де көбейген. Барлығы 1 272 көше болса, оның тек 483-і ғана асфальтталған, қалған 735 көшеге шағал тас төселген және 54 көше топырақ жолдар. Тұрғындардан келетін арыздардың басым бөлігі де осыған қатысты. Аудан әкімі Абзал Әліқұловтың айтуынша, 2021 жылы топырақ жолдарға шағал тас төсеу көзделуде. Сонымен қатар, 21,2 шақырым көшеге аяқжол салуға ұсыныс берілген екен.
Елдегі пандемияға қарамастан Қаратау ауданында инвестиция, құрылыс және тұрғын үймен қамту салалары көш бастап тұр. 2020 жылы ауданда 74,5 млрд. теңгеге құрылыс жұмыстары жүргізілген. Негізгі капиталға бағытталған инвестиция көлемі 154,9 млрд. теңгеге артқан. Онлайн есепке қатысқан қала әкімі Мұрат Әйтенов аудандағы атқарылған жұмыстарға оң бағасын берді.
2020 жылы Шымкент қаласына қарасты аудандарда атқарылған жұмыстардың қорытындысын Қаратау ауданы түйіндеді. Алда 24 ақпан күні шаһар басшысы үшінші мегаполистегі жүзеге асқан жұмыстар төңірегінде есеп береді.

aigak.kz