Созақта Ақбикеш мұнарасы жаңарыпты

     «Созақ біріншіден – қария, екіншіден – мінез, үшіншіден – өнер». Белгілі сөз шебері Асқар Сүлейменов өзінің туған жері туралы осылай деп айтқан екен. Шындығында, Созақтың тұла бойы сырға, құпия мен жұмбаққа толы. Сондықтан болар мұндағы ауылдың аттары да ерекшелеу. 62 755 тұрғыны бар Созақ ауданының әкімі Салыхан Полатов сырлы аймақтың өткен жылғы жұмысын қорытындылады.     Үш жарым жылдан бері Созақты басқарып отырған әкім есебі бұл жолы өзгерек болды. Әдеттегідей жарты сағат елдің ұйқысын келтіріп, есінететіндей баяндама болған жоқ. Керісінше бес минут ғана мінберде сөйлеп, кезекті бірден сұрақ-жауапқа берді. Созақ үшін жыр болып келе жатқан табиғи отын бұл жолы тағы да қозғалды. Әкім мырзаның сөзіне сүйенсек, 2021 жылы газдандыруға 1 миллиард 150 миллион теңге бөлінген. Осы мәселе қозғалғанда тұрғындар құлақ түріп тыңдап, жүздерінен күлкі байқалды. Бірақ, бұл теңге тек құбыр тартуға ғана бөлінген. Яғни, Созақтықтар үшін көгілдір отын келер жылы келуі мүмкін деген болжам бар. Қойылған сұрақтарды сараптап қарасақ, өткен жылдағы есепте көтерілген проблемар екені байқалды. Әліде, шешімі табылмаған жағдайларды қаржы ұстап тұр екен. Есепке қатысқан тұрғындар арасынан жариялық пен адалдықты талап еткен қарияларда кездесті. Солардың бірі ардагер Қасымжан Өмірұлы. «Цифрлар көңіл көншітеді, бірақ арғы шетінде адам тағдыры тұрғанын ұмытпайық. Әкім халық үніне құлақ асса орынды» -деп көп жағдайды еске түсірді. Өткен-кеткенді қозғап, ауыл өмірін айтқан ақсақалға қатысушылар «регламент» деп еске салып отырды. Бірақ, емін-еркін жүріп, ойын ашық айтып, көл-көсір көңілдегі қарияларды тоқтатудың қажеті жоқ болып қалды. Нәтижесінде, ақ батасын беріп, сәттілік тіледі.     Айтпақшы, биыл Созақ ауданы үшін ерекше жаңалық орын алды. Әмір Темір ғасырынан бері келе жатқан тарихи мұнара толық жаңарыпты. Қайсы деп қызықсаңыз онда біз айтайық: VIII ғасырлық тарихы бар «Ақбикеш» мұнарасы респуликалық бюджеттің есебінен қайта қалпына келтіріліпті. Жермен жексен болғалы тұрған Ақсүмбедегі жәдігердің жаңаруы созақтық ағайын үшін үлкен қуаныш. Бұл жөнінде өлкетанушы Мақсат Қарғабай есептік кездесуде көтерді. Оның айтуынша, тарихи орынға енді жарық жетпей тұр екен. Осы мәселе аудан әкімінің назарына ұсынылды.Айғақ-ақпарат