Түркістан облыстық мәслихат депутаттарына Елбасының «Алғыс хаты» табысталды

   Бұл күні Түркістан қаласында бірқатар облыстық мәслихат депутаттарын Елбасы, «Nur Otan» партиясының Төрағасы Нұрсұлтан Назарбаевтың Алғыс хатымен марапаттау шарасы өтті. Жиында «Nur Otan» партиясы Түркістан облыстық филиалы төрағасының бірінші орынбасары Бейсен Тәжібаев партияның жұмысына белсене атсалысып, көшбасшы партия қатарында депутат атанған азаматтардың еңбегіне тоқталды.
«Биыл елімізде аса жауапты сайлау өтті. Парламент Мәжілісі мен жергілікті мәслихат құрамы жаңа тұлғалармен толықты. Осы ретте елдің басым бөлігі өз таңдауын жасап, «Nur Otan» партиясына қолдау білдірді. Елбасы, Партия Төрағасы Нұрсұлтан Назарбаевтың парияны қайта жаңғырту бағытындағы тапсырмасына сәйкес, өңірлерде ауқымды жұмыстар атқарылды.

  Түркістан облысында да партияны жаңғырту, оның жұмысын жандандыру бойынша бастамалар қолға алынды. Сайлаудың қорытындысымен облыста «Nur Otan» партиясы 81 пайыздан астам дауыс жинап, облыстық мәслихаттағы 45 мандаттың 37-ін жеңіп алды. Бұл ортақ жеңіске сіздердің қосқан үлестеріңіз мол. Міне, осы еңбектеріңіз ескеріліп, Елбасы Нұрсұлтан Назарбаевтың Алғыс хаты тапсырылып жатыр. Баршаңызды осы марапатпен құттықтаймын!» -деді.

Марапат төрінен көрінгендер қатарында Бекарыс Шойбеков, Амалбек Өміртай, Өркен Есей, Насиба Атаевалар бар.

  Үгіт-насихат кезеңінде партия үміткерлері 4000-ға жуық іс-шараға қатысып, 220 мыңдай үйді аралап шықты. Негізінен облыстық мәслихаттағы «Nur Otan» депутаттық корпусына кәсіпкерлер, білім, денсаулық сақтау, өнеркәсіп саласы, үкіметтік емес ұйым, БАҚ өкілдері және ауыл шаруашылығы саласының өкілдері енді. Сонымен бірге 1 көпбалалы ана да мандатқа ие болды. Жалпы облыстық, аудандық және қалалық мәслихаттарды қосқанда облысымызда «Nur Otan» партиясы 263 мандатты иеленді. Түркістан облыстық мәслихатындағы «Nur Otan» партиясы фракциясының құрамы 60%-ке жаңарды. «Nur Otan» фракциясының жаңа құрамының 30 пайызға жуығы әйелдер мен 35 жасқа дейінгі жастардан тұрады.

Марапатқа ие болған депутаттар ел мүддесі жолында еңбек етіп, «Nur Otan» партиясының сайлауалды бағдарламасын жүзеге асыруға үлес қоса беретіндіктерін жеткізді.

Айғақ-ақпарат