Кітапханалар цифрландырылады

Шымкент қаласындағы кітапханалар алдағы уақытта цифрлық жүйеде жұмыс жасамақ. Енді оқырмандар кітап алу үшін өзінің жеке куәлігін кепілдікке қалдырмайды. Бұл қызметті арнайы ашылатын карталар атқаратын болады.
Шымкент қаласы бойынша 5 үлкен кітапхана және олардың 34 филиалдары бар. Бірақ, мекемелердің көбі орталықта орналасқан. Сондықтан Шымкент қаласы мәдениет, тілдерді дамыту және архивтер басқармасы қала шетіндегі елдімекендерден жаңа кітапханалар ашуды жоспарлап отыр және бұл жұмыстарды жыл соңына дейін аяқтау көзделген.
Ал цифрландыруға келсек, қала аумағындағы барлық кітапханалар алдағы уақытта жаңа жүйеге ауыспақ. Нақтырақ айтсақ, бұған дейін кітапты үйге алып кету үшін оқырмандар жеке куәлік қалдыруға міндетті болатын. Бұл келушілер үшін қолайсыздық тудырады. Сол себепті, әрбір адамға оқырман билетін карточка түрінде 5 минутта шығарып беретін жүйе орнату жоспарлануда. Бұл жобаның тиімділігі мен артықшылығына тоқталсақ, осы жүйенің көмегімен оқырман туралы, алған кітабы туралы және қанша мерзімге берілгені туралы ақпарат алуға болады. Нәтижесінде, оқырман саны мен сұранысқа ие кітаптар тізімін жасауға үлкен мүмкіндік бермек. Бұл туралы Шымкент қаласы мәдениет, тілдерді дамыту және архивтер басқармасы басшысының орынбасары Азамат Әмір мәлімдеді.
Жоғарыда аталған цифрлық жүйенің тиімділігін Шымкент қаласындағы ең үлкен Отырар кітапханасының қызметкерлері де растап отыр. Сонымен қатар, өзге де жаңалықтар мен өзгерістерге тоқталып өтті.
Иә, карантинге байланысты рухани орталыққа келушілер де азайып кеткен.

Егер де өзіңіз іздеген кітапты қала аумағындағы кітапханалардан таппасаңыз, арнайы сайт арқылы ұсыныс берсеңіз болады. 2021 жылы кітаптар қорын көбейтуге қазына қаржысынан 26 млн тг бөлінген.