Тоғыз жолдың торабы Арыстағы диқандар шет елге ауылшаруашылық өнімдерін экспорттауда. Арыс қаласына қарасты Жиделі ауылдық округінде Облыс басшысының тапсырмасына сәйкес екі реттік өнім алу жүйесі жолға қойылған. Бүгінгі таңда егін басында қауын, жүгері, мақта сынды өнімдері жинау қызу жүріп жатыр. Карантинге қарамастан кәсібін дөңгелетіп, шалғайдағы астықты шетел асырып, әлеуметтің әлеуетін көтеріп отыр.: Күз мезгілі – ала жаздай атыз жағалаған диқандар еңбегінің таразыға түсер сәті. Астықты алқапта толассыз еңбек еткен шаруалар, күннің жылт еткен шуағын тиімді пайдалану үшін тер төкті. Ағымдағы жылы Жиделі елді-мекенінің диқандары биылғы науқанды табыспен түйіндеп отыр. 
Күз мезгілі – ала жаздай атыз жағалаған диқандар еңбегінің таразыға түсер сәті. Астықты алқапта толассыз еңбек еткен шаруалар, күннің жылт еткен шуағын тиімді пайдалану үшін тер төкті. Ағымдағы жылы Жиделі елді-мекенінің диқандары биылғы науқанды табыспен түйіндеп отыр. Ел байлығын еселеуге өз үлестерін қосып, жоғары көрсеткішке қол жеткізіп отырған кәсіпкерлер арасында Жиделі ауылдық округіндегі «Нұрболат» шаруа қожалығы да бар. 2008 жылы негізі қаланған шаруа қожалығы бүгінде 30 гектады құрайды. Еңбек етсең ерінбей, тояды қарның тіленбей. Машақаты көп болғанымен алар өнім еселі. Қазіргі таңда, қожалық басшысы 20 гектар мақтаның 1 гектарынан 60 центнерге дейін өнім алады. Ал, 1 гектардан – 50 тонна қауын жинап, оны Ресей, Қырғызстан елдеріне экспортқа шығарып жатыр.
Дәмі бал татитын, қыртысы қанттай бақша дақылы сонау Өзбектан елінен алдырылады екен. Мұндағы диқандар дақылдарды будандастырып, жұлдыз, жиенбай, гүлстан сынды қауын түрлерін алып отыр.
Өткен ғасырда жүгерінің нанын жеген жандар дақылдың дәні мен дәмін ұмытпасы анық. Қауыннан бөлек мұнда астық тұқымдасына жататын дақылдардың бірі – жүгері де қолға алынған. Пісіп, терімге дайын тұр. Гектарынан 30 центнерге дейін таза жүгері алады.
Шалғай жатқан ауыл болса да, тұрғындар қол қусырып қарап отырмай қысы-жазы аянбай еңбек етеді. Қыста мал шаруашылығы, жазда егін басында. Ал, ауылда жұмыссыз жүрген жастар мен мектеп оқуышылары осында жұмыс істеп, күндік ақысын адалынан тауып отыр. Берекені көктен емес, еккен еңбектен іздегендердің асығы алшысынан түспек. Ағымдағы жылдың аптап ыстығы мен аңызақ желінде тер төккен Жиделі диқандары карантинге қарамастан орақ науқанын жақсы аяқтауда.
