Сайрам ауданында алғашқы қоңырау соғылмады. Халық көп шоғырланған аудан короновируспен ауырғандар саны бойынша көш бастап тұрғандықтан, бірде бір мектепте дәстүрлі оқыту жүйесі жолға қойылмаған. Санитарлық-эпидемиологиялық жағдайды ескеріп, оқушылар мен мұғалімдердің денсаулығын қорғау мақсатында 1-11 сынып оқушылары қашықтан оқытылады.Алайда 4 шағын жинақтық мектепті штаттық режимде оқыту жоспарлануда.
Сайрам аудандық білім бөліміне қарасты 75 мектепте 56 866 оқушы қашықтықтан оқуға тас-түйін дайын. 1 сыныпқа 5817 оқушы, мектеп алды даярлық тобына 4871 оқушы қабылданған. Ал, аз қамтылған отбасынан шыққан оқушылар саны 2621 құрайды.
Атаулы әлеуметтік көмек алатын 2414 отбасы 25000 мыңнан алса, оның ішіндегі 549 көпбалалы отбасыға 50000 тг көлемінде жәрдемақы берілген. 4842 оқушы мемлекет тарапынан компьютермен қамтамасыз етілген. Қыркүйек айының 15 дейін аудан бойынша барлық мұқтаж отбасыларды техникалық құрал жабдықтармен қамтамасыз ету жоспарланып отыр.
aigak.kz
