Шымкент: Халықаралық стандарттағы «CALL» орталығы ашылды

Шымкент қаласында Халықаралық стандарттарға сай Жедел медициналық жәрдем көрсету станциясының «Call» орталығы ашылды. 103-ке келіп түсетін қоңыраулардың барлығын диспетчерлер жаңадан ашылған орталықта қабылдап, бірыңғай автоматтандырылған жүйе арқылы бақылай алады.
Жаңа жоба аясында жедел жәрдем станциясында қоңырау қабылдау орындары 15-тен 30-ға дейін көбейді. Нәтижесінде, қала тұрғындары еш кедергісіз 103-ке хабарласа алады. Орталықтағы қоңырауларды басқару үшін PRI арнасының үздіксіз байланыс желісі мен спутниктік бақылау жүйесі (GPS) және мобильді интернет технологиясы қолданылады. Біріктірілген жүйе арқылы операторлар 10 секунд ішінде шақыртуды бригадаға бағыттайды. Сондай-ақ6 ақпараттық жүйенің көмегімен Шымкент қаласының картасы бойынша мекен-жайларды іздеу, көлік бағыттарының карталарын қадағалау, күту уақыты, қозғалыс жылдамдығы және т. б. сияқты операциялары туралы мәліметтерді автоматты түрде бақылауға болады. Шақыртуда жүрген мамандардың жұмысын бақылау үшін барлық 100 жедел жәрдем көлігіндегі қызметкерге 100 жаңа планшет берілді.

Айта кетейік, Шымкент қаласы әкімдігі мен «Мейдей Қазақстан» түрік компаниясы арасында жедел жәрдем қызметін жаңғырту жобасы аясында екі жақты меморандумға қол қойылған болатын. Екі жақты келіссөз нәтижесінде бірінші кезеңде жедел жәрдем қызметіне 100 жаңа көлік берілген. Екінші кезеңде осы жоба аясында түрік жедел жәрдем қызметінің түрі бойынша колл-орталық әлемдік стандарттар бойынша жаңғыртылды.
Жедел жәрдем автокөлігі инновациялық технологиялар қолданылған, заманауи қондырғылармен жабдықталған. Атап айтқанда, заманауи көліктерге сыртқы кардиостимулятор мүмкіндігі бар 100 дефибриллятор мен 100 өкпені жасанды желдендіру,100 реанимациялық портативті рюкзактар мен 12 каналды 100 электрокардиографтар (ЭКГ) орнатылған. Сондай-ақ, 100 стационарлық және 100 портативті оттегі беру жүйесі, реанимациялық бригадаларға жүрек массажына арналған 4 автопульс, педиатриялық бригадаларға жаңа туған нәрестелерді тасымалдауға арналған 4 инкубатормен жабдықталған.

aigak.kz