«Жібек жолы» кеден бекеті пандемияның эпицентріне айналуы мүмкін бе? Қазір мұнда 3 мыңға жуық еңбек мигранттары өз елдеріне қайта алмай, сандалып жүр. Өзбекстан, Тәжікстан азаматтары карантиндік талаптарды сақтағаны былай тұрсын, кеден бекетінің алдында жатын жайсыз бос орынды пана еткен. Картон қораптары тапқан адамға ғана бар. Айнала қоқысқа толған. Коронавирус инфекциясының біздің елімізде ғана емес, әлемде тарап жатқандығын ескерсек, карантиндік талаптар мұнда сақталмаған. Шетел азаматтарының шекара аса алмауының себебін Өзбекстан тарапы 14 күн бойы оқшаулайтын орындардың толып қалуымен түсіндірген. Десек те, еңбек мигранттарының Сарыағаш ауданының «Жібек жолы» кеден бекетіндегі жағдайы дәл осылай жалғаса берсе, қазірдің өзінде ыстығы көтеріліп, қан қысымы жоғарылаған ағайынның халі мүшкілдене түсері сөзсіз.
Ашық аспан астында кеден алдын пана еткен азаматтардың арасында кішкентайын ерткен отбасылар да бар. Бұл ретте, Қазақстан Республикасының Сыртқы істер министрлігі тиісті келіссөздер жүргізіп, мәселені оңтайлы шешеді деп сенеміз. Ал, аймақта қалыптасқан ахуалды жергілікті билік назарына алып, санитарлық нормалардың күнделікті сақталуын қадағалап отырса, адамзатқа қауіп болып келген пандемияның «ауылын» осы жерді күнелткен ағайын үшін алыстатуға әбден болады.
Мақтаарал мен Төлебидегі жағдайды күнделікті қадағалап, Түркістандағы қала құрылысын назардан шығармайтын облыс әкімі Өмірзақ Шөкеевке осы жерде қолдау көрсетіп, Сарыағаштағы бұл мәселені аудан көлемінде атқарып тастауға да жергілікті әкімдіктің қауқары жетеді. Облыс әкімінің 5 бірдей орынбасарынан Сәкен Қалқамановтың осы жерден әлеуметтік желі арқылы тікелей эфирге шыққандығы мәлім. Бірақ, түйткілді мәселе дер кезінде шешілмесе, арты аянышты жағдайға апаруы бек мүмкін.
Қазір мұнда тазалық жұмыстары жүргізілмегендіктен, қоқыстар тау болып үйіліп жатыр!
