Шымкентте кәсіпкерлік субъектілерінің санитарлық-эпидемиологиялық талаптарды сақтауын қадағалау бойынша мониторингтік топ күнделікті жұмыс жүргізуде. Еңбекші аудандық Тауарлар мен көрсетілетін қызметтердің сапасы мен қауіпсіздігін бақылау басқармасының мамандары мен тәртіп сақшылары бастаған мониторингтік топ қаладағы дәріханаларды аралады. Covіd-19 індеті кезеңінде науқасқа ұшыраған азаматтарға алғашқы көмек беретін дәріханалар жұмыстарымен танысты.
Мониторингтік топ Шымкент қаласының Бас мемлекеттік санитариялық дәрігерінің Қаулысына сәйкес, қоғамдық тамақтану және сауда орындары, азық-түлік дүкендері, моншалар мен дәріханалардың карантин шараларын сақтау талаптарына тексеру жүргізуде. Рейдтік шара алдымен, дәріханадан басталды.
Зерделенген нысандардағы жұмыс барысы қалыпты. Азаматтар дәрі-дәрмек аларда өзара арақашықтық сақтаған. Бәрі бетпердеде. Дәріханалар да талапқа сай жұмыс істеуде. Жұрт өзіне қажеттісін алып жатыр. Алайда, көп дәріханаларда дәл қазір парацетамол, аскорбин қышқылы, дексометазол, зитмак, аспирин сынды дәрілер жоқ.
Бақылау жүргізген топ күніне 30-ға жуық дәріхананы тексеріп жатыр. Соның ішінде 24 медициналық объектілерге ескертулер жасалды. Тепловизорлардың жоқтығы мен әлеуметтік қашықтықтың сақталмауына қатысты тәртіп бұзушылықтар анықталғанын айтты. Соған байланысты тиісті түсіндірмелер мен кеңестер берілді.
Жалпы аудан бойынша 12 нысан өз еркімен жабылған. Бүгінге дейін нысандарда өрескел тәртіп бұзушылыққа қатысты 15 әкімшілік хаттамалар толтырылған.
