Дүйсенбіде қаладағы карантин жағдайына байланысты алтыншы шақырылған Шымкент қаласы мәслихатының кезектен тыс алпыс алтыншы сессиясы онлайн режимде өтті. Депутат Сұлтанова Төреайым төрағалық еткен мәжілісте сессия күн тәртібіндегі екі мәселе қаралды.
Күн тәртібіндегі бірінші мәселе бойынша Шымкент қаласынан Қазақстан Республикасы Парламентінің Сенаты депутаттығына ұсыну туралы болды.
Мәслихат депутаттары Шымкент қаласынан Қазақстан Республикасы Парламентінің Сенаты депутатына 2019 жылы 24 маусымда Сенат депутаттығына сайланған Қаппарова Айгүл Жарылқасынқызын кандидат ретінде ұсыну туралы шешім қабылдады.
Мемлекет басшысы Қасым-Жомарт Тоқаевтың Жарлығымен Қазақстан Республикасы Парламенті Сенатының депутаттарын сайлау 2020 жылдың 12 тамызына белгіленді.
Бұдан бөлек, күн тәртібіндегі екінші мәселе бойынша, «Шымкент қаласының басқару схемасы туралы» Шымкент қаласы мәслихаттың 2018 жылғы шешіміне өзгерістер енгізілді.
Атап айтқанда, Шымкент қаласы әкімдігіне қарасты жергілікті мемлекеттік органдардың функцияларын тиімді пайдалану және штат санын оңтайландыру, мемлекеттік қызмет көрсетудің сапасын арттыру мақсатында Шымкент қаласының басқару схемасына келесі өзгертулер енгізілді.
Шымкент қаласының ішкі саясат және дін істері басқармасының ішінен дін істері функциясы алынып, жаңадан «Шымкент қаласының дін істері басқармасы» құрылды.
Шымкент қаласының ішкі саясат басқармасы мен отбасы, балалар және жастар істері жөніндегі басқармалары біріктіріліп, «Шымкент қаласының ішкі саясат және жастар істері жөніндегі басқармасы» болып қайта құрылды. Айта кетерлігі, Ішкі саясат, жастар және отбасы істері мәселелерін ұйымдастыру және оларды қадағалау ҚР Ақпарат және қоғамдық даму министрліктің құзыретіне кіреді.
Сонымен қатар, Шымкент қаласы сәулет және қала құрылысы мен жер қатынастары басқармалары біріктіріліп, «Шымкент қаласы сәулет, қала құрылысы және жер қатынастары басқармасы» болып қайта құрылды.
Шымкент қаласы мемлекеттік сәулет-құрылыс бақылау басқармасына тұрғын үй инспекциясының функциясы қосылып, «Шымкент қалалық орта сапасы және бақылау басқармасы» болып қайта құрылды.
Еңбек инспекциясы және көші-қон басқармасының көші-қон функциясы жұмыспен қамту басқармасына беріліп, басқарма «Шымкент қаласының мемлекеттік еңбек инспекциясы басқармасы» болып өзгерді.
Шымкент қаласының аумағында карантин және шектеу шараларының ұзартылуына байланысты күн тәртібіндегі мәселелер алдымен бірлескен тұрақты комиссияларының және «Nur Otan» партиясы фракциясының онлайн режимдегі отырыстарында егжей-тегжейлі талқыланды
