Әйтенов шымкенттік түлектерді мерекесімен құттықтады

Шымкент қаласының әкімі әлеуметтік желідегі парақшасында үшінші мегаполистің түлектерін соңғы қоңырау мерекесімен құттықтады. Өздеріңізге белгілі, биыл жаһанда орын алған пандемиялық жағдайға байланысты оқушылар қашықтықтан білім алып келді.

«Құрметті ұстаздар және оқушылар! Сіздерді 25 мамыр — соңғы қоңырау мерекесімен шын жүректен құттықтаймын! Бұл күні — түлектер он бір жыл білім алған алтын ұяларымен қоштасса, ұстаздар сүйікті шәкірттерін өмірге қанаттандырады. Білім мен ғылымның уызына қанып, үлкен өмір жолына қадам басып отырған түлектерге сәттілік тілеймін!
2019-2020 оқу жылында 32 оқушы халықаралық, республикалық олимпиадаларға және ғылыми жарыстарға қатысып, медальдарға ие болды. Биылғы оқу жылын 8 885 оқушы сәтті аяқтап отыр. Олардың 546-сы «Алтын белгіге» үміткер болса, 356 түлек «Үздік аттестат» алуға ниетті.
Әлемді жайлаған пандемияға байланысты елімізде төтенше жағдай жарияланып, мектептерде сабақтар тоқтап, қашықтықтан оқыту жүйесіне өткеніміз баршаңызға мәлім. Қашықтықтан оқыту жүйесін меңгерген шымкенттік ұстаздар мен оқушылар республика бойынша топ жарды.
Қадірлі ұстаздар мен мектеп бітіруші түлектер! Алдағы уақытта да үздіксіз ізденіспен жетістіктерге жете берулеріңізге тілектеспін! Сыңғырлаған соңғы қоңырау салтанаты құтты болсын!» — делінген құттықтау хат мәтінінде.