Ордабасы: Сапасыз құрылыс — сенімді сейілтеді

Ордабасы ауданында жүргізіліп жатқан құрылыстың кейбірі жүрісінен жаңыла бастағандай. Мәселен, орталығы Темірлан ауылында тәп-тәуір саябақ салынып жатыр. Жергілікті бюджеттен 319 миллион теңге бөлінген. Марқұм Әліпбек Өсербаев сегіз ай басқарып кеткен тұста Ордабасыдағы бірқатар саланың қызметкерлерін ұйқыдан селт еткізіп оятқан болатын. Бұрын-соңды болмаған жобаларды қолға алды. Енді, сол істер аяқсыз қалып қоймай ма? Жаңа тағайындалған әкімге әзірге айтар өкпе жоқ. Бірақ, тірлікті әу бастан қадағалап келе жатқан аудан әкімінің орынбасарлары не айтар екен?

Ордабасы ауданын басқарған Әліпбек Өсербаевтың мезгілсіз дүниеден өткеніне 40 күн асты. Іскер, халқы құрмет көрсеткен сол азаматтың тұсында Темірланның орталығындағы саябақ қолға алынып, құрылысы қызу жүрді. Бірақ, күн сәулесіндей жарқырап жатқан сол жобаға көлеңке түсе бастағандай. Бөлінген қаражатты, тірлікті бес саусағындай білетін азамат бұл дүниеден кетті деді ме? Әйтеуір соңғы кездері құрылыстан ақау байқалып жатыр. Мұны, тіпті саябақтағы мамандар да растады.

Саябақ екіге бөлінген. Бір тұсы ардагерлер, екінші жағы дендросаябақ. 7,5 шаршы метрді алып жатқан аумақта 70-80 жылдары егілген ағаштар бар. Дәл ортасынан «орыс арық» деп аталып кеткен арнадан су ағуда. Сол арықтың жағасы жөнделіп, жарық шамдар қойылған. Бірақ, ол шамдарды түнде жарқыратуға мүмкіндік жоқ. Өйткені, жарық жанған сәтте тоқ ұруы мүмкін. Сонда миллиондарға қойылған жарықтар не мақсатта тұр? Тендірді жеңіп алған құрылыс компаниясы жергілікті халықты «алдадым Құдай, алдадым» деді ма? Әлде құрылысқа жауапты мамандар бармақ басты, көз қысты ма?

Саябақтың сәні осылай кетіп жатыр. Елтай Сыздықов есімді азамат шырылдап, жан айқайын жеткізді. Құрылыс саласына жетекшілік ететін Ордабасы ауданы әкімінің орынбасары Азат Оралбаев осы жерде осалдық танытпай, керісінше Әліпбек Өсербаевтың аманаты деп жауапкершіліктің жүгін сезінуі тиіс-ақ. Ең бастысы өзі жоқтың, көзі жоқ болмаса екен.

Қазақта «айла білген кісілер, көзіңді байлап алдайды» деген мақал-мәтел бар. Сол қанатты сөздің астарын саябақтың жәйін байқап, журналистік зерттеу жүргізгенде ұққандай болдық. Әзірге, бұл құрылыс толық аяқталып біткен жоқ. Бірақ, Ордабасының орталығындағы Темірлан ауылында салынып жатқан саябақ құрылысы бақылауды, назарда ұстауды талап етіп тұр. Сондықтан, құрылыстың сапасы уақыт еншісінде деп, аудан әкімнің орынбасары Азат Оралбаев жоғарыда айтылған сынды сезінеді деген ойдамыз. Дегенмен де, әліптің артын бағайық…