Ата-анасынан ажырап қалған баланың бәрі қараусыз қалмайды. «Жетімін жылатпайтын» қазақта мұндай жағдайға тап болған балалар мемлекет қамқорлығына алынып, балалар үйлерінде тәрбиеленуде. Қасиетті Рамазан айында балғындарды елеусіз қалдырмайық деген ниетпен Арыс қаласы, Дермене ауыл әкімшілігіне қарасты, Қызылкөпір елді мекенінің тұрғыны, жеке кәсіпкер Ахмет Біржанов Арыстағы балалар үйіне ас-дәм таратты. Қамкөңіл балақайлар қайырымдылық шуағына бөлене түсті. Айта кетейік, бұған дейін Ахмет Біржанов Арыс оқиғасы орын алған тұста, нар түйені құрбандыққа шалып, ата-баба рухына Құран аяттарын түсіріп, халықтың алғысына ие болып еді.
Балалар – бұл әрбір шаңырақтың шамшырағы, ертеңгі күннің тірегі. Оларға қоғам болып қолдау көрсету – парасаттылықтың жарқын көрінісі. Осындай қасиетті Рамазан айында Төлеген Тәжібаев атындағы балалар үйіне игілікті іс жасалды. Қайырымдылық шарасына ұйытқы болған жеке кәсіпкер Ахмет Біржанов тәрбиеленушілерге ауызашар ретінде ас берді. Ағасының аманатын арқалаған інілері балғындарға ет, жеміс, шырын салынған арнайы себет үлестірді. Тәтті базарлыққа мәз-мейрам болған балалар аға-әпкелеріне тілектері мен ризашылықтарын білдірді.
Бір анадан тумаса да, туғанындай болып кеткен олар бір-біріне өте бауырмал. Шаңырақтарына келген кез келген мейманды құшақ жая қарсы алады. Бүгінде балалар үйінде 70-ке жуық балақай тәрбиеленіп жатыр. Осы орайда, әр балаға ана орнына ана бола білген, олардың қызығушылығын ескере білетін тәрбиеші, ұстаздардың еңбегі ерекше.
