Түркістандық науқастар мейірбикелерді төл мерекелерімен құттықтады

12 мамыр — Халықаралық мейірбикелер күні. Биыл ақ желекті абзал жандар айтулы күнді карантин режимінде өткізуде. Риясыз құрметке лайық жандарды науқастар құттықтап келіп жатыр.
Әр еккен инесінің өзі дертке дауа және үлкен жауапкершілікті талап ететін медицина қызметкерлеріне облыстық қоғамдық денсаулық басқармасының басшысы Марат Пашимов құттықтау тілегін жеткізіп, басқарма тарапынан еңбек өтілі 25 жылдан жоғары 120 орта буын қызметкерге құрмет грамотасы табысталды. «Сіздер күні-түні науқастардың жанында жүріп, аурумен күресте олардың әр бір жеңісі мен жеңілісінің күәгерлерісіздер. Емделушілермен бірге күйзеліп, бірге қуанасыздар да. Қызметтеріңіз ауыр да, өте жауапты. Мерекелік ісшараның реті келмегенімен сіздерге құттықтау тілегімді жолдаймын. Халық игілігі жолында жасап жатқан еңбектеріңізге сәттілік пен абырой, дендеріңізге саулық, отбасыларыңызға амандық тілеймін», -делінген Түркістан облыстық қоғамдық денсаулық басқармасының басшысы Марат Орынбасарұлының медбикелерге жолдаған құттықтауында.        
Төл мерекесінде барша марапатқа лайық ақ халатты жанның бірі Жетісай аудандық орталық ауруханасының медбикесі Баянсұлу Майлыбаева. 30 жыл бойы осы кәсіпті арқалаған медбике бүгінде коронавируске шалдыққан науқастарды емдеу ісінде тапжылмай еңбек етуде. Қауіпті індетпен күресіп жүріп, мерекені ұмытып кеткенін де жасырмайды. Айтуынша, бір науқастың болса да ауруын жеңуге үлесі тисе, бұдан асқан оған марапат жоқ.

Жалпы, облысымызда 18 мыңнан астам орта буын медицина қызметкері бар. 10 мың медбике ауыл халқының саулығына жауапты. Емдік шараларының 50 пайызы дәл осы мамандардың үлесінде.