Шымкент-Ленгір тас жолының бойындағы көпір іске қосылды. 2019 жылдың қазан айында жол жабылып, құрылысы басталған болатын. Содан бері Төлеби ауданы мен Шымкент қаласының арасында қатынайтын көліктер 5 шақырымды айналып жүрді.
Бұл Шымкент қаласы мен Төлеби ауданына қатынайтын жолаушылар үшін қуанышты жаңалық. Көпшілік карантинде отырғанда көпірдің құрылысы мерзімінен бұрын аяқталып, пайдалануға берілді. Жылдар бойы жөндеу жұмысын көрмеген нысанға үшінші мегаполистің бюджетінен 375 миллион бөлініп, соның 340 миллионы игеріліп отыр. Әлі қалған қаражатқа Сайрам су өзенінің жағалауы жөнделетін болады. Күрделі жөндеуді жүргізген «Корпорация Береке А» ЖШС.
Мамандар көпірдің құрылысы үшін отандық өнімді пайдаланған. Ұзындығы 76 метр, ені 28 метрді құрайтын су жаңа көпір негізінде 1970 жылдары салынған. 2012 жылдары 28 миллион теңгеге күрделі жөндеуден өткені бар. Алайда, ағынды судың көптігі өткелді қайтадан бұздыртып, жаңа көпір салынды.
Естеріңізге сала кетейік, бұған дейіп бұл көпірдің құрылысымен қала әкімі Мұрат Әйтенов танысқан болатын. Сол сәтте «Корпорация Береке А» ЖШС басшысы Рәшкүл Оспанәлиева 2020 жылдың мамыр айына дейін көпірді аяқтауға уәде берді. Міне, көпір жөнделіп, жолаушылар қатынай бастады.
