Түркістан облысында бес бірдей басқарма бірлесіп брифинг берді. Бұл жолғы мәселе әрине дүйім жұртты үрейлендіріп отырған коронавирус. Айтуға аузың бармайтын дертпен рухани астананың аймағы қалай күресіп жатыр? Қоғамдық денсаулық басқармасы басшысының міндетін атқарушы қазіргі таңда дәрігерлерге кеңес беріліп, 340 төсек орын дайындалып қойған дейді.
Қорқыныш көптеген ауруларды қоздырып, иммунитетті төмендетеді. Содан ағзамыз зиян шегіп, дертке күресуге мүмкіндік болмай қалуы мүмкін. Сондықтан дүрбелеңге ермей, бекерге қобалжымау қажет. Бастысы өзіңіз үшін жеке гигиеналық талаптарды сақтаңыз. Денсаулық сақтау саласындағылар осылай деп кеңес беріп жүр.
Елімізде төтенше жағдай жарияланғалы сабақ тоқтатылды. Жоғарғы оқу орындары мен колледждердің студенттері қашықтықтан оқыту жүйесіне көшті. Бірақ, Түркістан облысындағы ауыл-аймақтардың барлығында бірдей интернет жұмыс істемейді. Бөлек тақырып, күрделі мәселе. Ал, балабақша жағдайына келсек. Түркістанда 1441 балабақша бар екен. Оның 80 пайызы жекенің меншігінде болғандықтан күн сайын залалсыздандыруға қауқары жетпей отыр. Сондықтан жуық арада балабақшаларда жұмысын тоқтатпақ.
Ауырып ем іздегенше, сақтанған дұрыс. Сондықтан бес басқарма бірлесе отырып облыста атқарылып жатқан жұмыстарды айтып, халыққа кеңесте берді. Мәселен, әлеуметтік желіде есіп жүрген ақпараттың барлығына бірдей сене берудің қажеті жоқ. Және жалған ақпарат таратқандарға қомақты айыппұл салынатынын ұмытпаңыз.
Брифингте Түркістан әлеуметтік кәсіпкерлік корпарациясының басқарма басшысы азық-түлік бағасын реттеу бойынша мәлімет айтты. Оның айтуынша, қорға қажетті тауарларды сатып алуға 650 млн. теңге қарастырылған. Азық-түлік бағасын негізсіз өсіріп жатқандармен күрес жүруде, тек бағаны ұстап тұру бұл басқарманың құзырында емес екен. Сондай-ақ жеке кәсіпкерлердің құлағына алтын сырға. Әзірге шетелден жұмысшы тартып әуре болмаңыз.
«Айғақ-ақпарат»
